ភ្នំពេញ៖ នាព្រឹកថ្ងៃទី៩ ខែវិច្ឆិកា ឆ្នាំ២០២០ នេះ ក្រសួងការបរទេស និងសហប្រតិបត្តិការអន្តរជាតិ ចេញសេចក្តីប្រកាសព័ត៌មានថា អ្នកការទូតកម្ពុជាចំនួនពីរនាក់ និងបុគ្គលិកក្នុងស្រុកចំនួនពីរ នាក់ទៀត នៃស្ថានឯកអគ្គរាជ ទូតកម្ពុជាប្រចាំសាធារណរដ្ឋបារាំង បានធ្វើតេស្តសំណាកទទួលបានលទ្ធផលវិជ្ជមានកូវីដ -១៩ ។
សេចក្តីប្រកាសព័ត៌មានខាងលើ បានបន្តទៀតថា ក្រោយពួកគាត់ទាំងបួន នាក់បានជួបពិគ្រោះយោបល់ជាមួយគ្រូពេទ្យបារាំងរួចមក ពេលនេះពួកគាត់កំពុងសម្រាកព្យាបាលនៅផ្ទះរៀងៗខ្លួន និងទទួលទានថ្នាំតាមវេជ្ជបញ្ជា។
ជាមួយគ្នានោះ ស្ថានឯកអគ្គរាជទូតកម្ពុជានៅទីក្រុងប៉ារីស កំពុងរង់ចាំលទ្ធផលរបស់បុគ្គលិកក្នុងស្រុកម្នាក់ទៀតនៅថ្ងៃនេះ (ថ្ងៃចន្ទ
ទី ០៩ ខែវិច្ឆិកាឆ្នាំ ២០២០) ។
ទោះបីជារកឃើញអ្នកឆ្លងយ៉ាងណាក្តី ស្ថានឯកអគ្គរាជទូតកម្ពុជានៅទីក្រុងប៉ារីស នឹងបន្តដំណើរការជាប្រក្រតីតាមប្រព័ន្ធព័ត៌មានវិទ្យា។ ស្ថានទូតនឹងបន្តធ្វើការយ៉ាងជិតស្និទ្ធ ជាមួយអាជ្ញាធរសុខាភិបាលបារាំង ដើម្បីតាមដានការវិវត្តនៃជំងឺរបស់អ្នកការទូតកម្ពុជា និងបុគ្គលិកក្នុងស្រុកទាំងបួននាក់ខាងលើដោយយកចិត្តទុកដាក់បំផុត៕
