ភ្នំពេញ ៖ សូមបញ្ជាក់ថា អស់រយៈពេល១៧ថ្ងៃមកហើយ បន្ទាប់ពីជនសង្ស័យបាញ់សម្លាប់ លោកវរសេនីយ៍ទោ រ៉េត ស៊ីណែត នាយរងការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ កម្លាំងនាយកដ្ឋានព្រហ្មទណ្ឌក្រសួងមហាផ្ទៃ បានចុះធ្វើការនេះយ៉ាងម៉ត់ចត់យកចិត្តទុកដាក់បំផុតក្រោមការបញ្ជាផ្ទាល់ពី ឯកឧត្តម នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ ឯកឧត្តម .ឧត្តមសេនីយ៍ឯក អ៊ិន បូរ៉ា អគ្គស្នងការរងទទួលផែនព្រហ្មទណ្ឌ និងចង្អុលបង្ហាញយ៉ាងយកចិត្តទុកដាក់ពី ឯកឧត្តម ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជា ស្នងការនគរបាលរាជធានីភ្នំពេញ បានឲ្យកម្លាំងជំនាញបើកការស្រាវជ្រាវបន្ទាន់ក្រោយកើតហេតុ។ ដោយបានបទបញ្ជារពីថ្នាក់ដឹកនាំ កម្លាំងនាយកដ្ឋាននគរបាលព្រហ្មទណ្ឌ បានដឹកនាំសហការជាមួយ ស្នងការដ្ឋាននគរបាលរាជធានីភ្នំពេញ ស្នងការដ្ឋានខេត្តបាត់ដំបង មណ្ឌលគិរី រតនគីរី ស្ទឹងត្រែង ក្រចេះ ។
សមត្ថកិច្ចបានឲដឹងថា ជនដៃដល់មានឈ្មោះ អ៊ា ណារ៉េន អាយុ ៣៩ឆ្នាំ ធ្លាប់ជាប់ពន្ធនាគារ១៥ឆ្នាំ ពាក់ព័ន្ធនឹងករណីបាញ់ប្លន់យកទូរស័ព្ទ៩២០០ បណ្តាលឲ្យជនរងគ្រោះស្លាប់ កាលពីកំឡុងឆ្នាំង ២០០៣ ទើបនឹងចេញពីគុកក្នុងឆ្នាំ ២០១៨ ត្រូវបានសមត្ថកិច្ចបាញ់សម្លាប់ហើយ នៅល្ងាចថ្ងៃទី ១៥ មករា ២០២១ នេះ ចំណុចមាត់អូរជាប់ជើងភ្នំ អូរកណ្តៀរ ក្នុងដីចំការស្វាយចន្ទី ភ្នំអូកណ្តៀរ ភូមិអូព្រៈ ឃុំអូគ្រៀង ស្រុកសំបូរ ខេត្តក្រចេៈ ខណៈសមត្ថកិច្ចឡោមព័ទ្ធជនសង្ស័យ អោយទម្លាក់អាវុធ ប្រគល់ខ្លួនឲ្យសមត្ថកិច្ច ប៉ុន្តែជនសង្ស័យមិនព្រម បានដកកកាំភ្លើងបម្រុងបាញ់មកលើកងកម្លាំង ទើបសមត្ថកិច្ចប្រើសិទ្ធិការពារខ្លួន ខណៈនោះជនសង្ស័យបានបាញ់តប ជាមួយសមត្ថកិច្ចអស់ចំនួន១ប៉ង់ ក៏ត្រូវសមត្ថកិច្ចយើងបាញ់បណ្តាលឲ្យជនសង្ស័យស្លាប់តែម្តង។
ចំណែកឯជនសង្ស័យអ្នកចូលរួមសមគំនិត ឈ្មោះកែវ សុខមាន ភេទប្រុស អាយុ ២៥ឆ្នាំ (អ្នកបើករថយន្ត) កម្លាំងឃាត់ខ្លួនបាន នៅចំណុចផ្ទះជួល ក្បែរវត្តទួលតាឯក ភូមិអូរតាគាំ១ សង្កាត់ទួលតាឯក ក្រុងបាត់ដំបង ខេត្តបាត់ដំបង។
សូមរំលឹកថា៖ នៅយប់ថ្ងៃទី ២៩ ឈានចូលថ្ងៃទី ៣០ខែ ធ្នូ ២០២០ ជនសង្ស័យបានបាញ់សម្លាញ់ ជនរងគ្រោះឈ្មោះ រ៉េត ស៊ីណែត ឋានន្តរសក្តិវរសេនីយ៍ទោ នាយរងការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ នៅមុខប្រលានយន្តហោះពោធិ៍ចិនតុង ស្ថិតក្នុងសង្កាត់កាកាបទី២ ខណ្ឌពោធិ៍សែនជ័យ ផ្តើមចេញពីគ្រោះថ្នាក់ចរាចរណ៍ ។ ក្រោយកើតហេតុជនសង្ស័យទាំង២នាក់បាន បើករថយន្តដែលជិះ យកទៅផ្លុងចោលក្បែរផ្ទះប្រជាពលរដ្ឋមួយស្ថិតភូមិស្វាយឧត្តម សង្កាត់ពញាពន់ ខណ្ឌព្រែកព្នៅ។ ក្រោយមកទើបជនសង្ស័យបានបែងចែកគ្នារត់គេចខ្លួន ដោយឈ្មោះ កែវ សុខមាន រត់ទៅសម្ងំលាក់ខ្លួនជាមួយមិត្តភក្តិ ក្នុងបន្ទប់ជួលក្បែរវត្តទួលតាឯក ភូមិអូរតាគាំ១ សង្កាត់ទួលតាឯក ក្រុងបាត់ដំបង ខេត្តបាត់ដំបង នៅរសៀលថ្ងៃទី០៣ មករា ២០២១។ ចំណែកជនដៃដល់ ឈ្មោះ អ៊ាម ណារ៉េន បានបើរថយន្តជាមួយប្រពន្ធកូនស្រីនិងស្ត្រីម្នាក់ទៀតសំដៅទៅខេត្តមណ្ឌលគិរី ហើយបានបុកប៉ារ៉ាស់សមត្ថកិច្ចដាក់គោលដៅ ចំនួន៣គោលដៅនៅរសៀលថ្ងៃទី៤ មករា ២០២១ ក្នុងស្រុកកោះញ៉ែក ហើយថ្ងៃទី៥ ជនសង្ស័យបានថ្មើរជើងឆ្លងកាត់តាមព្រៃ មកដល់រតនគិរី និងបន្តថ្មើរជើងតាមព្រៃ ឆ្លងចូលខេត្តស្ទឹងត្រែងបន្តទៀត ជាហេតុធ្វើឲការបង្ក្រាបឃាត់ខ្លួនមួយនេះពិបាកបំផុត ហើយក៏ត្រូវយកចិត្តទុកដាក់បំផុតផងដែរ ព្រោះជនដៃដល់ជាមុខសញ្ញាចាស់ និងធ្លាប់ឆ្លងកាត់រៀនសូត្រជាកម្លាំងបានយ៉ាងស្ទាត់ជំនាញ។
រហូតដល់វេលាម៉ោង៥រសៀល ថ្ងៃទី ១៥ ខែមករា ឆ្នាំ២០២១ នាយកដ្ឋាននគរបាលព្រហ្មទណ្ឌ បានធ្វើការស្រាវជ្រាវរហូតដល់ កំណត់បានទីតាំងលាក់ខ្លួនរបស់ជនសង្ស័យ ហើយបានសហការជាមួយស្នងការដ្ឋាននគរបាលរាជធានីភ្នំពេញ, ស្នងការដ្ឋានគរបាលខេត្តក្រចេះ ស្នងការនគរបាលខេត្តស្ទឹងត្រែង អនុវត្តដីកាបង្គាប់ឲ្យចាប់ខ្លួនលេខ ០៣២ វ ដ វ ន ចុះថ្ងៃទី ១២ ខែមករា ឆ្នាំ២០២១ របស់លោក លិ សុផា ចៅក្រមស៊ើបសួរសាលាដំបូងរាជធានីភ្នំពេញ ។ នៅវេលាម៉ោង១៧និង៤៦នាទី កម្លាំងសមត្ថកិច្ចយើងបានប្រទះឃើញជនសង្ស័យនៅចំណុចមាត់អូរជាប់ជើងភ្នំ អូរកណ្តៀរ ក្នុងដីចំការស្វាយចន្ទី ស្តិតក្នុងភូមិអូរព្រះ ឃុំអូរគ្រៀង ស្រុកសំបូរ ខេត្តក្រចេះ ហើយសមត្ថកិច្ចយើងបានឲ្យជនសង្ស័យប្រគល់ខ្លួនតាមសម្រួល ប៉ុន្តែខណៈពេលនោះជនសង្ស័យរឹងរូសមិនព្រមប្រគល់ខ្លន និងបានបាញ់មកលើសមត្ថកិច្ចយើង ភ្លាមនោះសមត្ថកិច្ចយើងបានប្រើសិទ្ធិការពារខ្លួនដោយបាញ់តបតគ្នាទៅវិញទៅមកបណ្តាលឲ្យជនសង្ស័យឈ្មោះ អ៊ា ណារ៉េន ស្លាប់នៅហ្នឹងកន្លែងកើតហេតុ ។ វត្ថុតាងដកហូតមាន អាវុធខ្លីមួយដើម ម៉ាក CZ 75B លេខ 5493V ពណ៌ទឹកប្រាក់ មួយដើម ។ បច្ចុប្បន្នសាកសពទុកនៅវត្តអូរកណ្តៀរ បានប្រគល់ឲ្យស្នងការដ្ឋាននគរបាលខេត្តក្រចេះ ដើម្បីចាត់ចែងតាមនីតិវិធី៕
