កណ្តាល៖ រហូតមកទល់ថ្ងៃទី១៤ ខែមករា ឆ្នាំ២០២១ នេះ សមត្ថកិច្ចខេត្តកណ្តាល នៅពុំទាន់តាម ចាប់ខ្លួនជនជាប់ ឃុំ៤នាក់ ដែលលួចរត់ គេច ខ្លួនពីពន្ធនាគារខេត្តកណ្តាល មកវិញបាន នៅឡើយទេ ។
លោកវរសេនីយ៍ឯក ឡាក់ ម៉េងធី នាយការិយាល័យ ព្រហ្ម ទណ្ឌកម្រិតស្រាល នៃស្នងការដ្ឋាននគរបាល ខេត្តកណ្តាល បានឲ្យដឹងថា សមត្ថកិច្ចកំពុងតាមចាប់ខ្លួនជនជាប់ឃុំ ៤នាក់ នេះមកវិញហើយ ។
ដោយឡែក លោក ចាត ស៊ីនាង ប្រធានពន្ធនាគារ ខេត្តកណ្តាល ពុំទាន់សុំការបញ្ជាក់បានទេ ដោយសារទូរស័ព្ទចូល ជាច្រើនលើកគ្មានអ្នកទទួល ។
សូមរំលឹកថា៖ ជនជាប់ ឃុំ៥នាក់ បានលួចរត់គេចខ្លួនពីពន្ធនាគារខេត្តកណ្តាល ក្រោយជាប់ឃុំបាន តែប៉ុន្មានថ្ងៃប៉ុណ្ណោះ ក្នុងបទល្មើសផ្សេងៗគ្នា ដោយនាពេលកន្លងមក ក៏មានករណីលួចរត់នេះ ជាញឹកញាប់ផងដែរ ។
មជ្ឈដ្ឋានជាច្រើន បានរិះគន់ចំពោះការគ្រប់គ្រង ពន្ធនាគាររបស់ លោក ចាត ស៊ីនាង ប្រធាន ពន្ធនាគារ ខេត្តកណ្តាល ថា ហាក់ធ្វេសប្រហែស ជាខ្លាំង និងបង្ហាញពី អសមត្ថភាពក្នុងការគ្រប់គ្រង ផងដែរ ។
តាមប្រភពព័ត៌មាន បានទម្លាយអោយ TPN ដឹងថា កាលពីវេលាម៉ោង ១០យប់ថ្ងៃទី៩ ខែមករា ឆ្នាំ២០២១ ជនជាប់ឃុំចំនួន៥នាក់ បានលួចរត់ ចេញពីពន្ធនាគារ ខេត្តកណ្តាល ដោយមានការធ្វេសប្រហែសពីមន្ត្រីពន្ធនាគារ ។ ប៉ុន្តែភ្លាមៗនោះ ជនជាប់ឃុំម្នាក់ ក្នុងចំណោម៥នាក់ ត្រូវបានសមត្ថកិច្ចចាប់ខ្លួនបានមកវិញ។
នៅពេលនេះ សមត្ថកិច្ចកំពុងតាមចាប់ ខ្លួនជនជាប់ឃុំ ៤នាក់ផ្សេងទៀតដែលកំពុងរត់គេចខ្លួននោះ ដែលជនទាំងនោះមានម្នាក់ត្រូវបានផ្តន្ទាទោសពាក់ព័ន្ធនឹង ករណីគ្រឿងញៀន និង ៣នាក់ទៀតពាក់ព័ន្ធនឹងករណីលួច និងលួចមានស្ថានទម្ងន់ ។
ជាការកត់សម្គាល់ ដែលកន្លងមកតែងតែមានករណីជនជាប់ឃុំ លួចរត់គេចខ្លួនពីពន្ធនាគារ ខេត្តកណ្តាលជាញឹកញាប់ ហើយក្រុមការងារ អធិការកិច្ចរបស់ក្រសួងមហាផ្ទៃ ក៏បានចុះមកពិនិត្យផ្ទាល់ដល់ ពន្ធនាគារខេត្តកណ្តាលផងដែរ ។
ក្រុមការងារអធិការកិច្ចរបស់ក្រសួងមហាផ្ទៃ តែងតែណែនាំ អោយលោក ចាត ស៊ីនាង ប្រធានពន្ធនាគារ ខេត្តកណ្តាល ដែលជាមន្ត្រីផ្ទេរ មកពីពន្ធនាគារ ប៉េហ្ស៊ី ត្រូវយកចិត្តទុកដាក់ អោយបានល្អបន្ថែមទៀត ចំពោះការគ្រប់គ្រងអ្នកទោសក្នុងពន្ធនាគារ ។ ប៉ុន្តែ ទោះបីជាយ៉ាងណា បញ្ហានៅតែកើតមានជាដដែលៗ ចំពោះការលួចរត់គេចខ្លួនរបស់អ្នកទោស នេះអាចបង្ហាញពីអសមត្ថភាព ក្នុងការគ្រប់គ្រងអ្នកទោស របស់លោក ចាត ស៊ីនាង ប្រធានពន្ធនាគារខេត្តកណ្តាលផងដែរ ៕
