រដ្ឋបាលខេត្តព្រះសីហនុ រៀបចំកិច្ចប្រជុំបូកសរុបការងារប្រចាំខែ កក្កដា និងលើកទិសដៅអនុវត្តន៍ការងារបន្តខែសីហា
NSN/ខេត្តព្រះសីហនុ៖ នាព្រឹកថ្ងៃអង្គារ ១៤រោច ខែអាសាឍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី៣០ ខែកក្កដា ឆ្នាំ២០១៩ ឯកឧត្តម គួច ចំរេីន អភិបាល នៃគណៈអភិបាលខេត្តព្រះសីហនុ បានបេីកកិច្ចប្រជុំបូកសរុបលទ្ធផលការងារប្រចាំខែកក្កដា និងទិសដៅអនុវត្តវគ្គបន្តរបស់រដ្ឋបាលខេត្ត។
ដែលមានការ អញ្ជើញចូលរួមពីសំណាក់ លោកអភិបាល អភិបាលរង ក្រុង ស្រុក លោកប្រធាន អនុប្រធាន មន្ទីរ អង្គភាពនានាក្នុងខេត្តព្រះសីហនុទាំងអស់ផងដែរ។ នៅក្នុងកិច្ចប្រជុំនេះ បានធ្វើនូវបទបង្ហាញអំពីការងារដែលបានសម្រេចនូវខែកក្កដា កន្លងទៅ របស់ មន្ទីរអង្គភាពនានាក្នុងខេត្តព្រះសីហនុ ព្រមទាំងបានពិនិត្យនូវការងារដែលបានដាក់ទិសដៅទាំង១៣ចំនុចសំខាន់ៗ ក្នុងកិច្ចប្រជុំបូកសរុបការងារប្រចាំខែ មិថុនា កន្លងទៅ។ ព្រមទាំងបានអនុញ្ញាត្តអោយគ្រប់ការិយាល័យទាំងអស់នៃរដ្ឋបាលខេត្តព្រះសីហនុ រដ្ឋបាលក្រុង ស្រុក និងមន្ទីរ អង្គភាពនានាទាំងអស់ លើកឡើងនូវកត្តាដែលនាំអោយរាំងស្ទះការងារដើម្បីរកដំណោះ ស្រាយ។
បន្ថែមពីលើនេះ ដើម្បីឲ្យខេត្តព្រះសីហនុមានភាពរឹងមាំខាងវិស័យទេសចរណ៍ អភិបាលខេត្តព្រះសីហនុ ឯកឧត្តម គួច ចំរើន បានប្ដេជ្ញាថា៖ ត្រូវអនុវត្តទៅតាម ទិសដៅការងារទាំង១៣ ចំនុចសំខាន់ៗ មានដូចជា៖ ទី១៖ ប្តេជ្ញាខិតខំអនុវត្តអោយបានម៉ឺងម៉ាត់នូវរដ្ឋធម្មនុញ្ញ ច្បាប់ លិខិតបទដ្ឋានគតិយុត្តិជាធរមាន និងគោលការណ៍ណែនាំនានារបស់រាជរដ្ឋាភិបាល ដែលបានដាក់ចេញឲ្យមានប្រសិទ្ធភាពខ្ពស់។
ទី២៖ ប្តេជ្ញាគោរពគាំទ្រ និងអនុវត្តឱ្យបានខ្ជាប់ខ្ជួននូវកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា។
ទី៣៖ ខិតខំគោរព និងអនុវត្តតាមគោលការណ៍ដឹកនាំចង្អុលបង្ហាញ និងរាល់ការផ្តល់នូវអនុសាសន៍ដ៏ខ្ពង់ខ្ពស់របស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួង ក៏ដូចជាថ្នាក់ដឹកនាំក្រសួងនានាឱ្យបានល្អ ដើម្បីពង្រឹងការគ្រប់គ្រងដឹកនាំប្រកបដោយប្រសិទ្ធភាពតម្លាភាពក្នុងការបំពេញ ភារកិច្ចនៅរដ្ឋបាលថ្នាក់ក្រោមជាតិ ។
ទី៤៖ បន្តការខិតខំទប់ស្កាត់ លុបបំបាត់រាល់បាតុភាពអសកម្មនានាទាំងឡាយ ដែលធ្វើឱ្យប៉ះពាល់ បង្កការថ្នាំងថ្នាក់ដល់ប្រជាពលរដ្ឋ ។
៥-ចូលរួមចំណែកលើកកំពស់ជីវភាព រស់នៅសុខុមាលភាពការកាត់បន្ថយភាពក្រីក្ររបស់ប្រជាជន ស្របតាមគោលនយោបាយរបស់រាជរដ្ឋាភិបាលកម្ពុជា និងជាពិសេសអនុសាសន៍សម្តេចតេជោ «ពង្រឹងការអនុវត្តច្បាប់ គ្មានការលើកលែង»។
ទី៦៖ យកចិត្តទុកដាក់រៀបចំកសាង និងអភិវឌ្ឍន៍លើវិស័យនានាក្នុងខេត្ត ពិសេសការរៀបចំកែលំអរសោភ័ណភាពទីក្រុងឆ្នេរសមុទ្រ និងទីប្រជុំជនក្នុងការចូលរួមប្រលងប្រណាំង ទីក្រុងស្អាត ធានាបាននូវបរិស្ថានល្អ ប្រកបដោយសក្តានុពលសេដ្ឋកិច្ចសង្គម លើកស្ទួយជីវភាពរស់នៅប្រកបដោយវិបុលភាព ផាសុខភាពសុខមាលភាពជូនប្រជាជនទូទាំងខេត្តប្រកបដោយចីរភាពនិងបរិយាប័ន្ន។
ទី៧៖ ជំរុញការអនុវត្តគោលនយោបាយភូមិ-ឃុំ មានសុវត្ថិភាព ឲ្យកាន់តែមានប្រសិទ្ធភាពខ្ពស់ ដើម្បីបន្តរក្សាសន្តិសុខ សណ្តាប់ធ្នាប់សង្គម រក្សាស្ថេរភាពនយោបាយ និងភាពសុខដុមនីយកម្មជូនប្រជាពលរដ្ឋឱ្យកាន់តែល្អប្រសើរឡើងថែមទៀត យកចិត្តទុកដាក់ អនុវត្តគោលនយោបាយកំណែទម្រង់ស៊ីជម្រៅមុតស្រួច ជាពិសេសគោលនយោបាយវិមជ្ឈការ និងវិសហមជ្ឈការដើម្បីការអភិវឌ្ឍន៍ តាមបែបប្រជាធិបតេយ្យនៅថ្នាក់ក្រោមជាតិ ស្របតាមកម្មវិធីជាតិ រយៈពេល១០ឆ្នាំ ផែនការយុទ្ធសាស្ត្រ រយៈពេល ៥ឆ្នាំ និងកម្មវិធីវិនិយោគ ៣ឆ្នាំរំកិល ក្នុងតំណាក់កាលបន្តឲ្យទទួលបាន លទ្ធផលជាវិជ្ជមាន។
ទី៨៖ ពង្រឹងថែរក្សាស្មារតីសាមគ្គី ឯកភាពផ្ទៃក្នុង ជួរគណៈអភិបាលបង្កើតទំនាក់ទំនងល្អជាមួយក្រុមប្រឹក្សា រួមទាំងក្រសួង ស្ថាប័នអង្គភាពពាក់ព័ន្ធ អង្គការដៃគូរអភិវឌ្ឍ ។
៩-លើកកំពស់សមត្ថភាពមន្ត្រីរាជការស៊ីវិល មន្ត្រីជំនាញ កងកម្លាំងប្រដាប់អាវុធ ដើម្បីធានាឱ្យរដ្ឋបាលខេត្តអនុវត្តមានភាពរលូន ពង្រឹងការគ្រប់គ្រងស្ថិតិប្រជាពលរដ្ឋគ្រប់គ្រងស្ថិតិជនអន្តោប្រវេសន៍ កម្មករចំណាកស្រុកឱ្យ បានច្បាស់លាស់។
ទី១០-ចូលរួមសហប្រត្តិការអនុវត្ត សេចក្តីសម្រេចស្តីពីការបង្កើតគណៈកម្មាការត្រួតពិនិត្យគុណភាពសំណង់ នៅខេត្តព្រះសីហនុសំដៅត្រតពិនិត្យបទដ្ឋាន បច្ចេកទេស បទដ្ឋានគតិយុត្តិ ស្តង់ដារសំណង់ ស្តង់ដារសុវត្ថិភាព និងគុណភាពសំណង់ ព្រមទាំងត្រតពិនិត្យលក្ខណៈសម្បត្តិរបស់ក្រមទទួលម៉ៅការសាងសង់។
ទី១១៖ ដឹកនាំមន្ត្រីរាជការ មន្ត្រីជំនាញ ដើម្បីធ្វើការអភិវឌ្ឍមូលដ្ឋាន និងបម្រើសេវាសាធារណៈជូនបងប្អូនប្រជាពលរដ្ឋឱ្យបានល្អប្រសើរ។
ទី១២-សម្របសម្រួលស្ថាប័នមានសមត្ថកិច្ច ដើម្បីដោះស្រាយ និងស្វែងរកយុត្តិធម៌ជូនប្រជាពលរដ្ឋ និង ទី១៣-ត្រៀមកម្លាំងអន្តរាគមន៍ សម្រាប់ដោះស្រាយ គ្រោះមហន្តរាយ និងបញ្ហាផ្សេងៗ ដែលអាចកើតមានឡើងជាយថាហេតុ។
ឯកឧត្តម គួច ចំរើន បាន មានប្រសាសន៍បន្ថែម ថា៖ គ្រប់មន្ទីរ-អង្គភាពជំនាញជុំវិញខេត្តទាំងអស់ ស្ថាប័នតុលាការ កងកម្លាំងប្រដាប់អាវុធ ក្រុង ស្រុក ឃុំ សង្កាត់ ត្រូវបន្តអនុវត្តគោលការណ៍ ៣ធំៗ គឺ១.គោលការណ៍ពង្រឹងច្បាប់ ២.ការដោះស្រាយទំនាស់ដីធ្លី និង ៣.ជម្រុញការដោះស្រាយការងារបរិស្ថាន និងសណ្តាប់ធ្នាប់សាធារណៈ សុវត្ថិភាពសាធារណៈ។ ៕
