ខេត្តព្រះវិហារ៖ ទីតាំងសិប្បកម្មកែច្នៃឈើខុសច្បាប់មួយកន្លែង ស្ថិតនៅក្នុងភូមិចំបក់សែនជ័យ ឃុំកន្ទួតស្រុកជាំក្សាន្ត ខេត្តព្រះវិហារត្រូវសមត្ថកិច្ចចុះបង្ក្រាបនិងដកហូតវត្ថុតាងមួយចំនួនធំដើម្បីបញ្ជូនទៅតុលាការចាត់ការទៅតាមច្បាប់។
លោក វុធ សាវី ព្រះរាជអាជ្ញារងអមសាលាដំបូងខេត្តព្រះវិហារ បានឲ្យដឹងនៅរសៀលថ្ងៃទី២៨ ខែមករានេះ ថា លោកបានដឹកនាំកម្លាំងចម្រុះមានមន្ត្រីនគរបាល, នាយផ្នែករដ្ឋបាលព្រៃឈើជាំក្សាន្ត, នាយសង្កាត់រដ្ឋបាលព្រៃឈើកន្ទួត។
កម្លាំងសមត្ថកិច្ចបានចុះបង្ក្រាបទីតាំងសិប្បកម្មកែច្នៃឈើខុសច្បាប់មួយកន្លែងក្នុងស្រុកជាំក្សាន្តនេះជាលទ្ធផលបានរឹបអូសវត្ថុតាងរួមមាន៖ ម៉ាស៊ីនវាលតាបឈូស, និងឈើគ្រប់ប្រភេទជាច្រើនម៉ែត្រគូបទៀតរួចបញ្ជូនទៅរក្សាទុកនៅសង្កាត់រដ្ឋបាលព្រៃឈើកន្ទួតដើម្បីចាត់ការទៅតាមច្បាប់។
លោក វុធ សាវី បានបន្តថា ទីតាំងសិប្បកម្មកែច្នៃឈើខុសច្បាប់នេះគឺឈ្មួញជួលឲ្យប្រជាពលរដ្ឋធ្វើ។
ស្របពេលដែលលោកដឹកនាំកម្លាំងចុះទៅគឺឈ្មួញបានឈប់បណ្តោះអាសន្នដោយបន្សល់ទុកនូវសម្ភារនិងឈើចម្រុះជាច្រើនប្រភេទ។
លោកបន្តថា ទីតាំងសិប្បកម្មកែច្នៃឈើនៅកន្លែងណាក៏ដោយដែលគ្មានច្បាប់ការអនុញ្ញាតត្រឹមត្រូវទេនោះ គឺត្រូវតែចុះបង្ក្រាប។
វត្ថុតាងទាំងអស់នេះត្រូវបានប្រគល់ទៅឲ្យជំនាញរដ្ឋបាលព្រៃឈើចាត់ការបន្ត៕
