ដោយ NSN/ ខេត្តព្រះសីហនុុ ៖ នាព្រឹកថ្ងៃទី៣១ខែ កក្កដា ឆ្នាំ២០១៩ នេះ នៅសណ្ឋាគារ ឆ្នេរថ្មីក្រុង-ខេត្តព្រះសីហនុ មន្ទីរទេសចរណ៍ខេត្តព្រះសីហនុ រួម សហការជាមួយ អង្គការ Swisscontact បានរៀបចំពិធីបើកវគ្គបណ្តុះបណ្តាល បដិបដិសណ្ឋារកិច្ចសម្រាប់ខេត្តព្រះសីហនុ (HoKa)។ ពិធីនេះមានការអញ្ជើញចូលរួមដោយ លោក ហូ ឧត្តម ជាតំណាងដ៏ខ្ពង់ខ្ពស់របស់រដ្ឋមន្ត្រីក្រសួងទេសចរណ៍ លោក ស៊ុត ចាន់ថន តំណាងដ៏ខ្ពង់ខ្ពស់របស់ ឯកឧត្តម គួច ចំរើន 
អភិបាល ខេត្តព្រះសីហនុ និង លោក តាំង សុចិត្រគ្រឹស្នា ប្រធានមន្ទីរ ទេសចរណ៍ ខេត្តព្រះសីហនុ។
វគ្គសិក្សានេះ ចាប់ផ្តើមពី ថ្ងៃទី១ ខែសីហា រហូតដល់ ថ្ងៃទី ២១ ខែកញ្ញា ឆ្នាំ២០១៩ ដែល មានរយៈពេល ៧ សប្តាហ៍ ក្នុង១សប្តាហ៍ បង្រៀនតែមួយថ្ងៃទេ គឺថ្ងៃព្រហស្បត្តិ៍។
លោក ហូ ឧត្តម បានបញ្ជាក់ថា៖ HoKa គឺជាកម្មវិធីបណ្តុះបណ្តាលខាងក្នុង (In-House Training)ដំបូងគេ ដែលផ្តោតលើអ្នកធ្វើការងារដែលមិនសូវមានជំនាញ នៅតាមសណ្ឋាគារ និងភោជនីយដ្ឋាន ដើម្បី អោយ ពួកគេអាចប្រើប្រាស់ ជំនាញបច្ចេកទេសដែលបានសិក្សានៅកន្លែងការងារ របស់ពួកគេ។ ការបណ្តុះបណ្តាលគម្រោងHoKa ត្រូវបានធ្វើឡើងអោយស្របទៅតាមក្របខ័ណ្ឌគុវឌ្ឍិជាតិ និងអាស៊ានស្របតាមស្មារតីនៃកិច្ចព្រមព្រៀងទទួលស្គាល់គ្នាទៅវិញទៅមកលើអ្នកជំនាញទេសចរណ៍អាស៊ាន (MRA-TP) ការបណ្តុះបណ្តាលHoKa មាន១២មេរៀនដែលរៀបចំឡើងដោយផ្តោតលើអ្នកបម្រើសេវាកម្មអាហារនិងភេសជ្ជៈនៅខេត្តព្រះសីហនុ។ មេរៀនដែលត្រូវរៀនរួមមាន១) ការងារខ្ញុំជាអ្នកបម្រើសេវាកម្ម ២) ការទំនាក់ទំនងក្នុងបដិសណ្ឋារកិច្ច ៣)សេវាកម្មប្រណីត ៤)សម្ភារបិរក្ខាភោជនីយដ្ឋាន ៥)ចំណេះដឹងអំពីបញ្ជីមុខម្ហូប ៦)ចំណេះដឹងអំពីភេសជ្ជៈ ៧)ជំនាញលក់ ៨)ជំនាញសេវាកម្ម ៩)សេវាកម្មភេសជ្ជៈ ១០)លំដាប់លំដោយក្នុងការផ្តល់សេវាកម្មនៅក្នុងភោជនីយដ្ឋាន ១១) នីតិវិធីក្នុងភោជនីយដ្ឋាន ១២)អនាម័យ សន្តិសុខ និងសុវត្ថិភាពក្នុងភោជនីយដ្ឋាន។
ចំណែក លោក តាំង សុចិត្រគ្រឹស្នា ប្រធាន មន្ទីរទេសចរណ៍ខេត្តព្រះសីហនុ មានប្រសាសន៍ឱ្យដឹងថា ៖ បច្ចុប្បន្នវិស័យទេសចរណ៍ត្រូវបានរាជរដាជរដ្ឋាភិបាលកម្ពុជា ចាត់ទុកថា ជាមាសបៃតង និងជាការនាំចេញ នៅនឹងកន្លែង ដោយបាន រួម ចំណែកចូលរួមអភិវឌ្ឍ សេដ្ឋកិច្ច និងសង្គម តាមរយៈការបង្កើត ប្រាក់ចំណូល ជូនជាតិ បង្កើតការងារ ជំរុញការវិនិយោគ និងចូលរួមកាត់បន្ថយភាពក្រីក្រ របស់ប្រជាពលរដ្ឋ ។ លើសពីនេះទៀត ទេសចរណ៍ក៏បាន ចូលរួម ចំណែកលើកកម្ពស់ ថែរក្សា និង អភិរក្សសម្បត្តិ វប្បធម៌ និង ធម្មជាតិ របស់ ប្រទេសចូលរួមកាត់បន្ថយ ការកើនឡើងនៃកំដៅភពផែនដី ព្រមទាំងទ្រទ្រង់ ការអភិវឌ្ឍន៍ ប្រកបដោយចីរភាព។
លោក គ្រឹស្នា បានបន្ថែមថា វគ្គ បណ្តុះ បណ្តាល បដិសណ្ឋារកិច្ចសម្រាប់ខេត្តព្រះសីហនុ នឹង ផ្តល់នូវចំណេះដឹង ជំនាញ និង ឥរិយាបថ ខ្ពស់ ដល់យុវជន យុវនារីកម្ពុជា ដើម្បីអាចចូលរួម អភិវឌ្ឍសមត្ថភាព ឲ្យកាន់តែប្រសើរឡើង ជាពិសេស ជំរុញ ការផ្តល់សេវាកម្ម ប្រកបដោយ ភាពកក់ក្តៅ ជូនភ្ញៀវទេសចរជាតិ និង អន្តរជាតិ និងចូលរួមលើកកម្ពស់ខេត្ត ព្រះសីហនុ ជាខេត្តគោលដៅទេសចរណ៍សម្រាប់បច្ចុប្បន្ន និងអនាគត។ ពាក់ព័ន្ធទៅនឹងកិច្ចសហការក្នុង ភាពជាដៃគូរ រដ្ឋនិងឯកជន គណៈកម្មាធិការអ្នកជំនាញ ទេសចរណ៍ នៃ ក្រសួងទេសចរណ៍ បានខិតខំប្រឹងប្រែង ពង្រឹង កិច្ចសហប្រតិបត្តិការ ជាមួយអង្គការ និង ដៃគូរអភិវឌ្ឍ ដើម្បីចូលរួម ពង្រឹងនិងពង្រីក ការអភិវឌ្ឍន៍ វិស័យទេសចរណ៍នៅកម្ពុជា៕
