ភ្នំពេញ ៖ តុលាលការរាជធានីភ្នំពេញ វេលាថ្ងៃត្រង់ទី១៣ ខែសីហា នេះ បានប្រកាសសាលក្រមផ្តន្ទាទោសលោក អះម៉ាត់ យ៉ះយ៉ា អតីតរដ្ឋលេខាធិការក្រសួងសង្គមកិច្ចនិងក្មួយប្រុសឈ្មោះ អ៊ីស្មាអែលពិន ឧស្មាន ដាក់ពន្ធនាគារម្នាក់១៥ឆ្នាំ ពីបទការនាំចេញដោយមិនស្របច្បាប់ក្នុងអំពើជួញដូរមនុស្ស និងការធ្វើអាជីវកម្ម ផ្លូវភេទប្រព្រឹត្តនៅចំណុចរាជធានីភ្នំពេញ ដែលរឿងហេតុនេះ បានកើតឡើងកាលពីឆ្នាំ២០០៤។
លោក អះម៉ាត់ យ៉ះយ៉ា និង ក្មួយប្រុស ត្រូវបានចោទប្រកាន់ថា ពាក់ព័ន្ធនឹងការបញ្ជូនស្ត្រីដោយខុសច្បាប់ទៅធ្វើការនៅប្រទេស អារ៉ាប៊ីសាអ៊ូឌីត ដែលកន្លងមក លោកបដិសេធដា នោះគឺជារឿងដែលគេប្រឌិតឡើងដើម្បីចាប់ខ្លួនលោកប៉ុណ្ណោះ។
ករណីឃាត់ខ្លួន រហូតឈានដល់តុលាការផ្តន្ទាទោសនាថ្ងៃនេះ ដោយសារតែជនជាប់ចោទទាំង ២នាក់ បានសមគំនិតគ្នាក្នុងការនាំជនរងគ្រោះជាស្ត្រីខ្មែរទៅលក់ក្រោមរូបភាព ទៅបម្រើការងារតាមផ្ទះនៅ ប្រទេសអារ៉ាប់ប៊ីសាអូឌីត កាលពីអំឡុងឆ្នាំ២០០៤ រហូតដល់ឆ្នាំ២០១៧។
សូមជម្រាបថា បន្ទាប់ពីសវនាការប្រកាសសាលក្រមនៅចំពោះមុខជនត្រូវចោទរួចមក តុលាការបានសម្រេចបញ្ជូនលោក អះម៉ាត់ យ៉ះយ៉ា និងក្មួយប្រុសម្នាក់ ទៅឃុំខ្លួនក្នុងពន្ធនាគារភ្លាមៗដើម្បីអនុវត្តទោសក្នុងពន្ធនាគាររយៈពេល១៥ឆ្នាំ និងបង្គាប់ឲ្យជនជាប់ចោទទាំង ២នាក់សងជំងឺចិត្តទៅជនរងគ្រោះចំនួន ២០០លានរៀល ផងដែរ៕
