ភ្នំពេញ៖ ការសិក្សាស្រាវជ្រាវរបស់អង្គការ FOUR PAWS ( ហ្វ័រ ផ ) បានបង្ហាញថា នៅប្រទេសវៀតណាម កម្ពុជា និងឥណ្ឌូនេស៊ី, ឆ្កែនិងឆ្មាប្រមាណ១០លានក្បាល ត្រូវបានសម្លាប់យកសាច់ ជារៀងរាល់ឆ្នាំបើទោះជាប្រជាជនក្នុងស្រុកហូបសាច់នេះ មានចំនួនតិចតួចក៏ដោយ ។
ការស្រាវជ្រាវបានបង្ហាញផងដែរថា ការសម្លាប់សត្វឆ្កែនិងឆ្មាត្រូវបានធ្វើឡើងក្នុងរូបភាពអាក្រក់និងសាហាវឃោរឃៅ ដូចជា លួចពីម្ចាស់ដែលចិញ្ចឹមសត្វនោះ ហើយយកទៅពន្លិចទឹក ចងក ឬចាក់ សម្លាប់ដើម្បីយកសាច់វាទៅបរិភោគ ។
របាយការណ៍អង្គការដដែលនេះ ក៏បានបង្ហាញពីប្រទេសក្នុងតំបន់អាស៊ីដែលបរិភោគសាច់ទាំងនេះច្រើនផងដែរគឺប្រទេសចិន ដោយក្នុងនោះគ្រាន់តែក្នុងពិធីបុណ្យសាច់ឆ្កែរៀបចំជាលក្ខណៈឯកជននៅយូលីនរយៈ ពេល ១០ថ្ងៃ រាប់ចាប់ពីថ្ងៃទី២១ខែមិថុនានេះ ឃើញថាសត្វក៏មានការសម្លាប់សត្វឆ្កែជាច្រើនផងដែរ ខណៈអង្គការ ហ្វ័រផ បានចាត់ទុកការប្រារព្ធពិធីនេះ ជាការគំរាមកំហែងដល់សត្វនិងសុខភាពសាធារណៈ ។
អ្នកសង្កេតការណ៍ក្នុងតំបន់នៃទីក្រុងយូលីនប្រទេសចិន បានបង្ហាញថាក្នុងរយៈពេល១០ថ្ងៃនៃពិធីបុណ្យសាច់ឆ្កែមានសត្វឆ្កែប្រមាណ១០០០ក្បាលនឹងបានដង្ហែនៅក្នុងប្រអប់ឈើចង្អៀត និងទ្រុងដែកហើយទីបំផុតត្រូវបានសម្លាប់ចម្អិននិងបរិភោគនៅក្នុងភោជនីយដ្ឋាននៅក្នុងតំបន់នោះ ។
លោកបណ្ឌិត ការ៉ាន់វី គុគ្រេចា ពេទ្យសត្វនិងជាអ្នកគ្រប់គ្រងគម្រោងនៃយុទ្ធនាការ ការបញ្ចប់ការជួញដូរសត្វឆ្កែ និងឆ្មាបាននិយាយថា វាជាការខកចិត្តខ្លាំងណាស់ ដែលពិធីបុណ្យនេះ ត្រូវបានអនុញ្ញាតអោយបន្តដោយអាជ្ញាធរ ។ ពួកគេបានជ្រើសរើសធ្វើជាបិទភ្នែកមើលមិនឃើញសកម្មភាពខុសច្បាប់នេះទៅវិញ ។ វាបង្ហាញថាការសម្រេចចិត្តរបស់ប្រទេសចិន ក្នុងការបញ្ឈប់ការបែងចែកសត្វឆ្កែ ជាបសុសត្វគឺជាក់ស្ដែងគ្រាន់តែនិយាយនឹងមាត់ទទេប៉ុណ្ណោះ ។
លោកបណ្ឌិតបន្តថា លក្ខខណ្ឌ គ្មានអនាម័យ ដែលសត្វឆ្កែទាំងនោះត្រូវបានគេឃាំងទុកនិងសម្លាប់នៅក្នុងពិធីបុណ្យអាចបណ្ដាលនាំអោយមានការផ្ទុះឡើងនូវជំងឺដូចជាជំងឺឆ្កួតជ្រូក និងជំងឺអាសន្នរោគក៏ដូចជាការរីករាលដាលនៃវីរុសឆ្លងពីសត្វទៅមនុស្ស ដូចជាជំងឺកូវីដ១៩ ដែលបានឃើញរួចមកហើយនោះ ។ ប្រទេសចិន មានឱកាសធ្វើជាប្រទេសគំរូមួយ ជាពិសេសគំរូដល់ប្រទេសនៅអាស៊ីអាគ្នេយ៍ ប៉ុន្តែការអនុញ្ញាតអោយមានការប្រារព្ធពិធីនេះឡើង បានបង្ហាញថាពួកគេមិនមានលទ្ធភាពច្បាស់លាសក្នុងការដោះស្រាយហានិភ័យសុខភាពដែលកើតចេញពីការជួញដូរសត្វឆ្កែនិងឆ្មានេះឡើយ ។
បើតាមវីដេអូចេញផ្សាយដោយអង្គការ ហ្វ័រ ផ ក៏បានបង្ហាញពីហានិភ័យនៃការជួញដូរនិងធ្វើអាជីវកម្មលើសត្វឆ្កែនិងឆ្មាផងដែរ ដោយសារតែសត្វទាំងនេះ មិនមានប្រភពច្បាស់លាស់ហើយអាចប្រឈមនឹងការឆ្លងជំងឺផ្សេងៗទៅដល់មនុស្ស ។ ម្យ៉ាងទៀតជំនួញនិងអាជីវកម្មសត្វនេះ គឺសាហាវឃោរឃៅណាស់ដោយសារតែការពិឃាតសត្វនេះ គឺមានលក្ខណៈហិង្សាជ្រុលខ្លាំងពេក។ អង្គការហ្វ័រផ តែងតែអំពាវនាវអោយបញ្ឈប់នូវការធ្វើជំនួញសត្វឆ្កែនិងឆ្មាជាច្រើនលើកច្រើនសារមកហើយផងដែរ ៕
