អាមេរិក ៖ ប្រធានាធិបតីអាមេរិកលោក Donald Trump កាលពីថ្ងៃអង្គារបានបង្ហាញឆន្ទៈក្នុងការសហការជាមួយប្រទេសចិន ឬប្រទេសដទៃទៀត ដើម្បីរួមគ្នាផលិតវ៉ាក់សាំងឱ្យបានជោគជ័យ បើទោះបីពេលនេះ មានភាពតានតឹងរវាងទីក្រុងប៉េកាំង និងវ៉ាស៊ីនតោនកំពុងកើតមានឡើងក៏ដោយ។ នេះបើយោងតាមប្រភពពី CNA។
នៅពេលសួរថាតើរដ្ឋបាល របស់លោកនឹងសហការជាមួយចិន សម្រាប់ធ្វើវ៉ាក់សាំង ដល់ប្រជាជនអាមេរិចឬយ៉ាងណា?លោក Trump បានឆ្លើយតបថា យើងមានឆន្ទៈក្នុងការសហការជាមួយប្រទេសដទៃទៀត ដើម្បីនាំមកនូវលទ្ធផលជោគជ័យ នៃដំណើរការបង្កើតវ៉ាក់សាំង។ ហើយសហរដ្ឋអាមេរិក ក៏នឹងយល់ព្រមធ្វើការរួមគ្នាជាមួយប្រទេសចិនដែរ មិនថាប្រទេសចិននឹងក្លាយជាប្រទេសទី១ អាចរកឃើញវ៉ាក់សាំងការពារជំងឺកូវីដ១៩ ឬ យ៉ាងណាទោះទេ។
គួរបញ្ជាក់ថា ការអះអាងបែបនេះរបស់លោក Trump ត្រូវបានធ្វើឡើងបន្ទាប់ពីក្រុមអ្នកវិទ្យាសាស្ត្រជាច្រើនបានជឿជាក់ថា វ៉ាក់សាំងប្រឆាំងនឹងជំងឺកូវីដ១៩ ដែលត្រូវបានបង្កើតឡើងដោយក្រុមហ៊ុន CanSino Biologics និងអង្គភាពស្រាវជ្រាវឱសថនៃយោធារបស់ចិន បានបង្ហាញលទ្ធផលនូវវិជ្ជមាន ហើយក៏មានសុវត្ថិភាពក្នុងការឆ្លើយតបទៅប្រព័ន្ធភាពស៊ាំដែរ៕
