នៅព្រឹកថ្ងៃទី៥ ខែវិច្ឆិកា ឆ្នាំ២០២០ នេះ ក្រសួងសុខាភិបាល បានចេញសេចក្តីប្រកាសព័ត៌មានបញ្ជាក់ថា អ្នកជំងឺកូវីដ១៩ ចំនួន ៣នាក់ត្រូវបានព្យាបាលជាសះស្បើយ ហើយមិនមានរកឃើញករណីឆ្លងជំងឺកូវីដ-១៩ ថ្មី នោះទេ ខណៈអ្នកកំពុងសម្រាកព្យាបាលនៅសល់ ៦នាក់ទៀត។
ដោយឡែក អ្នកដែលបានប៉ះពាល់ជាមួយឯកឧត្តមរដ្ឋមន្ត្រីការបរទេស និងពាណិជ្ជកម្មនៃប្រទេសហុងគ្រី គិតត្រឹមម៉ោង២៣ និង០០នាទីនៃយប់ថ្ងៃទី០៤ ខែវិច្ឆិកា ឆ្នាំ២០២០ សរុបមានចំនួន៦២៨នាក់ ត្រូវបានតេស្ត និងទទួលបានលទ្ធផលអវិជ្ជមានវីរុសកូវីដ-១៩ ទាំងអស់។ ទន្ទឹមនោះ ក្រសួងក៏បាននិងកំពុងបន្តធ្វើតេស្ត និងស្រាវជ្រាវរកអ្នកប៉ះពាល់ជាបន្តទៀត និងបន្តជូនព័ត៌មាននៅពេលទទួលបានលទ្ធផលតេស្ត។
សូមជម្រាបថា គិតត្រឹមម៉ោង ៧ ៖ ០០នាទីព្រឹកថ្ងៃទី៥ ខែវិច្ឆិកា ឆ្នាំ២០២០ នៅកម្ពុជា មានរកឃើញអ្នកមានវីរុសកូវីដ-១៩ មានចំនួនសរុប ២៩២នាក់ (ស្ត្រី៦០នាក់ និងបុរស២៣២នាក់) ក្នុងនោះចំនួនអ្នកព្យាបាលជាសះស្បើយ សរុបចំនួន ២៨៦នាក់ (ស្មើនឹង ៩៧.៩៥% ធៀប នឹងចំនួនអ្នកមានវីរុសកូវីដ-១៩ទាំងអស់) និងអ្នកសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត រាជធានីភ្នំពេញចំនួន ៦នាក់៕
