ភ្នំពេញ ៖ បុរសម្នាក់ បានរងរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យភ្លាមៗ ខណៈកំពុងជិះម៉ូតូ ហើយត្រូវម៉ូតូមួយគ្រឿងទៀតបើកបុកពីក្រោយ ហើយគេចខ្លួនបាត់។
ហេតុការណ៍នេះ បានកើតឡើងកាលពីវេលាម៉ោង១១និង៤០នាទីយប់ ថ្ងៃទី៨ ខែមករា ឆ្នាំ២០២១ នៅចំណុចខាងក្រោយមន្ទីរពេទ្យរុស្ស៊ី តាមបណ្ដោយផ្លូវ៤៣០ កែងផ្លូវ១៩៩ ស្ថិតក្នុងសង្កាត់ទំនប់ទឹក ខណ្ឌបឹងកេងកង។
តាមប្រភពព័ត៌មាន បានឲ្យដឹងថា មុនពេលកើតហេតុ គេបានឃើញបុរសម្នាក់ជិះម៉ូតូម៉ាកស្កូពី ពណ៌ស លាយខៀវ ពាក់ស្លាកលេខភ្នំពេញ1AV- 6537 បើកបរដោយបុរសម្នាក់ ធ្វើដំណើរតាមបណ្តោយផ្លូវលេខ៤៣០ ក្នុងទិសដៅពីជើងទៅត្បូង ខណៈមកដល់ចំណុចកើតហេតុបំណងបត់ស្តាំទៅលិចភ្លាមនោះស្រាប់តែមានម៉ូតូមួយគ្រឿងមិនចាំម៉ាកជិះគ្នា២នាក់ធ្វើដំណើរមកពីក្រោយក្នុងល្បឿនលឿន ហើយបានបុកពេញទំហឹងបណ្ដាលឲ្យដួលទាំងអស់គ្នា និងធ្វើឲ្យភាគីខាងរថយន្តរងគ្រោះរបួសធ្ងន់ ចំណែកភាគីខាងបង្ករបួសស្រាល ហើយលើកម៉ូតូជិះទៅបាត់ទៅ។
ក្រោយកើតហេតុ ជនរងគ្រោះ ត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗ ចំណែកម៉ូតូ ត្រូវបានសមត្ថកិច្ចយកទៅរក្សាទុករង់ចាំប្រគល់ជូនម្ចាស់វិញ៕
