ក្រោយអាចកំណត់ពីទីតាំងនៃប្រអប់ខ្មៅទាំងពីររបស់យន្តហោះដែលធ្លាក់ អាជ្ញាធរឥណ្ឌូណេស៊ីបានបញ្ជូនក្រុមអ្នកជំនាញខាងមុជទឹកឲ្យទៅស្វែងរកប្រអប់ខ្មៅដោយមិនបង្អង់យូរឡើយ។ ចំណែក អ្នកស៊ើបអង្កេតឥណ្ឌូណេស៊ី បាននិយាយនៅថ្ងៃចន្ទ ទី១១ មករាថា អ្នកបើកយន្តហោះរបស់ក្រុមហ៊ុនអាកាសចរណ៍ស្រីវីចាយ៉ា (Sriwijaya Air) មិនបានប្រកាសពីភាពអាសន្ន ឬបញ្ហាបច្ចេកទេសណាមួយនោះទេមុនពេលធ្លាក់ចូលសមុទ្រ។
រហូតមកដល់ពេលនេះ ឥណ្ឌូណេស៊ីនៅមិនទាន់អាចស្វែងរកឃើញពីមូលហេតុដែលបណ្តាលឲ្យយន្ដហោះវ័យ ២៦ ឆ្នាំខាងលើ ធ្លាក់ចូលក្នុងទឹកសមុទ្ទក្រោយហោះហើរចេញពីទីក្រុងហ្សាការតាបានរយៈពេលតែ ៤ នាទីនោះ។ ក៏ប៉ុន្តែ អាជ្ញាធរឥណ្ឌូណេស៊ីបានកំណត់រកឃើញទីតាំងប្រអប់ខ្មៅទាំងពីររបស់យន្តហោះ ហើយក្រុមអ្នកជំនាញមុជទឹកកំពុងស្វែងរកប្រអប់ខ្មៅយ៉ាងសស្រាក់សស្រាំ។
កំណត់ត្រាសន្ទនាជាមួយក្រុមបច្ចេកទេសត្រួតពិនិត្យចរាចរណ៍ផ្លូវអាកាស បានគូសបង្ហាញពីការផ្លាស់ប្តូរព័ត៌មានគ្នាជាធម្មតា។ ប៉ុន្តែគេបានបាត់ទំនាក់ទំនងពីយន្តហោះប៊ូអ៊ីង៧៣៧-៥០០ របស់ក្រុមហ៊ុនអាកាសចរណ៍ក្នុងស្រុកឥណ្ឌូណេស៊ី នៅពេលដែលយន្តហោះបានធ្លាក់ចុះមកវិញក្នុងកម្ពស់ប្រមាណ ៣ពាន់ម៉ែត្រ ក្នុងរយៈពេលតិចជាងមួយនាទីមុននឹងធ្លាក់ចូលក្នុងសមុទ្រជ្វា។
លោកនួរកាយូ អ៊ុតូម៉ូ (Nurcahyo Utomo) អ្នកស៊ើបអង្កេតម្នាក់របស់គណៈកម្មាធិការគ្រប់គ្រងផ្នែកសុវត្ថិភាពដឹកជញ្ជូនជាតិឥណ្ឌូណេស៊ីបានមានប្រសាសន៍ថា ការសន្ទនារវាងអ្នកបើកបរយន្តហោះជាមួយនឹងក្រុមបច្ចេកទេសចរាចរណ៍ផ្លូវអាកាសគឺធម្មតានិងគ្មានអ្វីគួរឱ្យសង្ស័យឡើយ។ មួយវិញទៀត គេក៏មិនទទួលបានការប្រកាសអាសន្ន ឬបញ្ហាបច្ចេកទេសណាមួយ ពីអ្នកបើកបរយន្តហោះឡើយ។
ទន្ទឹមគ្នានេះ បើយោងទិន្ន័យបឋម អ្នកជំនាញបានលើកឡើងថា “យន្ដហោះ” ហាក់ដូចគ្មានបញ្ហាណាមួយគួរឲ្យកត់សម្គាល់សោះឡើយមុនពេលបាត់ខ្លួន និងត្រូវធ្លាក់ចូលទឹកសមុទ្ទ កាលពីរសៀសថ្ងៃសៅរ៍ ទី៩ មករា។
នៅដំណាក់កាលនេះ អាជ្ញាធរក្រុងហ្សាការតាមិនទាន់ដឹងនោះទេ ថាតើអ្វីជាមូលហេតុដែលបណ្តាលឲ្យយន្តហោះដឹកអ្នកដំណើរសរុប ៦២ នាក់ របស់ក្រុមហ៊ុនស្រីវីចាយ៉ា ត្រូវជួបឧបទ្ទវហេតុធ្លាក់យ៉ាងអាថ៌កំបាំងបែបនេះ។ ដូច្នោះហើយការស្វែករកឃើញប្រអប់ខ្មៅគឺជាសង្ឃឹមតែមួយគត់ដែលអាចឲ្យគេរកឃើញព័ត៌មានសំខាន់ៗ និងឈានដល់ការកំណត់ពីមូលហេតុនៅពីក្រោយការធ្លាក់យន្តហោះ។
គួរបញ្ជាក់ជូនថា ប្រអប់ខ្មៅដែលមានបំពាក់នៅលើយន្តហោះមានចំនួនពីរ ហើយប្រអប់ខ្មៅនោះ មានសមត្ថភាពអាចកត់ត្រាព័ត៌មានអំពីល្បឿន កម្ពស់ និងទិសដៅនៃយន្តហោះ ក៏ដូចជាការសន្ទនា របស់អ្នកបើកយន្តហោះ ហើយនិងអាចផ្តល់ទិន្នន័យសំខាន់ៗ ជុំវិញមូលហេតុនៃការធ្លាក់យន្តហោះបាន៕
មេរតន៍ ចាត់ចែង
ស្ត្រីវ័យជាង៣០ម្នាក់ធ្លាប់ជាអតីតនិស្សិតពេទ្យឆ្មបសម្រេចចិត្តធ្វើអត្តឃាតខ្លួនឯងនៅនឹងដើមពុទ្រាគួរឲ្យរន្ធត់
ភ្នំពេញ៖ ស្ត្រីជាអតីតនិស្សិតពេទ្យឆ្មបម្នាក់ដែលជាប់អាហារូបករណ៍រៀននៅប្រទេសថៃឈ្មោះ ឈីវ សំអុន អាយុ៣១ឆ្នាំ មានលំនៅនៅផ្ទះលេខ១៤៦D ផ្លូវលំ ក្នុងភូមិ០២ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ នៅវេលាម៉ោងប្រមាណ៦ព្រឹក ថ្ងៃទី១១ ខែមករា ឆ្នាំ២០២១ បានបញ្ចប់ជីវិតខ្លួនឯងដោយចង ក នៅត្រង់ចំណុចដីឡូតិ៍ មួយកន្លែងតាមផ្លូវកែវចិន្តា ក្រុម១២ ស្ថិតក្នុងភូមិ០១ សង្កាត់ជ្រោយចងា្វរ ខណ្ឌជ្រោយចង្វារ រាជធានីភ្នំពេញ។
តាមប្រភពពីសមត្ថកិច្ចឱ្យដឹងថា ស្ត្រីរូបនោះបានបញ្ចប់ជីវិតខ្លួនឯង ដោយយកខ្សែនីឡុងចងភ្ជាប់ទៅនឹងដើមពុទ្រាក្នុងព្រៃ ហើយត្រូវបានក្មេងៗក្នុងភូមិទៅបេះផ្លែពុទ្រា ក៏ប្រទះឃើញហើយរត់ទៅប្រាប់ឪពុកម្តាយ រួចក៏រាយការណ៍ប្រាប់នគរបាលមូលដ្ឋានចុះពិនិត្យ រួចក៏បានប្រាប់ទៅបងប្អូននារីរងគ្រោះរូបនេះតែម្តង។
ប្រភពពីបងស្រីសព បានឱ្យដឹងថា ប្អូនស្រីគាត់មានជំងឺសរសៃប្រសាទប្រមាណជិត១០ឆ្នាំមកហើយ ដោយមួយរយៈពេលប្រមាណជិត២ខែនេះ នាងក៏បានរត់ចេញពីផ្ទះទៅបាត់ខ្លួន មិនដឹងថា ទៅទីណានោះទេ ក៏ស្រាប់តែទទួលបានដំណឹងពីសមត្ថកិច្ចថា នាងបញ្ចប់ជីវិតខ្លួនឯងតែម្តង។បងស្រីសពបន្តថាប្អូនស្រីគាត់ធ្លាប់ជានិស្សិតពេទ្យ ដែលរៀនពូកែ ប្រឡងជាប់អាហារូបករណ៍ ទៅរៀននៅប្រទេសថៃ រហូតដល់ជិតចប់ទៅហើយ ប៉ុន្តែដោយសារតែការខិតខំរៀនខ្លាំងពេក ទើបបណ្តាលឱ្យនាងរលាកខួរក្បាល ក៏មានជំងឺសរសៃប្រសាទ ហើយត្រូវបានសាលាទាក់ទងមកក្រុមគ្រួសារឱ្យទៅទទួលយកមកស្រុកកំណើតវិញ និងបានបញ្ចប់ជីវីតខ្លួនឯងនៅពេលនេះតេម្តង។
សពស្ត្រីរងគ្រោះត្រូវបានសមត្ថកិច្ចប្រគល់ឲ្យក្រុមគ្រួសារដើម្បីយកទៅធ្វើបុណ្យតាមប្រពៃណី៕
