ខេត្តកណ្ដាល ៖ បើតាមសេចក្តីរាយការណ៍បានឲ្យដឹងថា កាលពីវេលាម៉ោង១១និង១០នាទីយប់ ថ្ងៃទី១០ ខែមករា ឆ្នាំ២០២១ មានអំពើប្លន់១ករណី (លួចមានស្ថានទម្ងន់ទោស)នៅចំណុចលើផ្លូវចូលភូមិខ្នោការ ឃុំបារ៉ុង ស្រុកល្វាឯម ខេត្តកណ្ដាល បង្កឡើងដោយជនសង្ស័យមានគ្នា២នាក់ បានប្រើប្រាស់មធ្យោបាយដាក់ដើមឬស្សីកាត់ទទឹងផ្លូវ ដើម្បីស្ទាក់ប្លន់យកម៉ូតូពីជនរងគ្រោះ។
អំពើប្លន់ខាងលើនេះ មានជនរងគ្រោះ២នាក់ប្តីប្រពន្ធ ដែលប្តីឈ្មោះ ឡាយ រុយ អាយុ៤៦ឆ្នាំ មុខរបរជាងភ្លើង និងប្រពន្ធឈ្មោះ ស្រី សុខឃឿន អាយុ៤២ឆ្នាំ មុខរបរកម្មករ មានទីលំនៅភូមិខ្នោការ ឃុំបារ៉ុង ស្រុកល្វាឯម ខេត្តកណ្ដាល ។
សេចក្តីរាយការព៍ឲ្យដឹងបន្តថា ជនសង្ស័យមានគ្នា២នាក់ដែលទាន់មិនស្គាល់អត្តសញ្ញាណ ព្រោះបានគេចខ្លួនទៅបាត់ស្រមោល ដោយបោះបង់ម៉ូតូរបស់ជនរងគ្រោះទុកចោល នៅពេលដែលម្ចាស់ម៉ូតូបានទូរស័ព្ទហៅឲ្យបងប្អូនជួយស្ទាក់ចាប់តាមផ្លូវ ។
ពាក់ព័ន្ធនឹងករណីខាងលើនេះ ត្រូវបានជនរងគ្រោះរៀបរាប់ប្រាប់សមត្ថកិច្ចថា មុនពេលកើតហេតុ នៅវេលាម៉ោងខាងលើ គាត់២នាក់ប្ដីប្រពន្ធបានចេញពីពិធីមង្គលការមួយកន្លែង ស្ថិតនៅភូមិខ្នោការ ឃុំបារ៉ុង ស្រុកល្វាឯម ខេត្តកណ្ដាល ដោយជិះម៉ូតូ១គ្រឿងម៉ាក suzuki lets ផ្លាកលេខ ភ្នំពេញ 1HZ 5854 ប្រពន្ធជាអ្នកឌុប ប្តីជិះពីក្រោយ ដើម្បីត្រឡប់ទៅលំនៅដ្ឋានវិញ ។
ជនរងគ្រោះបន្តថា លុះពេលជិះទៅដល់ចំណុចកើតហេតុដែលជាកន្លែងស្ងាត់មួយ ពុំមានផ្ទះប្រជាពលរដ្ឋនៅនោះទេ ក៏ស្រាប់តែបានឃើញមានដំបងឬស្សី១ដើមប៉ុនក.ដៃប្រវែងជាង១ម៉ែត្រដាក់កាត់ទទឹងផ្លូវ ពេលនោះគាត់បានឈប់ម៉ូតូ ដើម្បីរើសយកដំបងឬស្សីនោះចេញ ក៏ស្រាប់តែមានជនសង្ស័យមិនស្គាល់អត្តសញ្ញាណ២នាក់ បានស្ទុះចេញពីចិញ្ចើមផ្លូវសំដៅមករកគាត់ ដែលម្នាក់មានកាំបិតនៅនឹងដៃ ហើយលើកឡើងបម្រុងកាប់គាត់ជាប្រពន្ធដែលកំពុងកាន់ដៃចង្កូតម៉ូតូ និងម្នាក់ទៀតដេញតាមប្តីនៅពីក្រោយ ។
ជនរងគ្រោះបន្តថា ដោយឃើញសកម្មភាពជនសង្ស័យធ្វើដូច្នោះ ពួកគាត់មិនហ៊ានតដៃជាមួយលោកចោរនោះទេ ក៏បានប្រគល់ម៉ូតូឲ្យជនសង្ស័យតាមសម្រួលទៅ សុំតែទុកជីវិតប៉ុណ្ណោះ លុះពេលចោរប្លន់យកម៉ូតូបានហើយ ជនសង្ស័យទាំង២នាក់បានជិះឌុបគ្នាគេចខ្លួនកាត់តាមភូមិស្វាយមាស ឃុំវិហារសួគ៌ ស្រុកខ្សាច់កណ្ដាល ។
ជនរងគ្រោះបន្តទៀតថា ភ្លាមៗនោះ គាត់ក៏បានទូរស័ព្ទទៅប្អូនឈ្មោះ សុខន ដែលបើករថយន្តចេញទៅមុនឲ្យជួយស្ទាក់ចាប់ចោរដែលប្លន់ម៉ូតូទៅ ទើបប្អូនប្រុសឃើញជនសង្ស័យជិះម៉ូតូឌុបគ្នាមកដល់ល្មម ក៏បើករថយន្តដេញតាមជនសង្ស័យពីក្រោយ រហូតដល់ឃុំព្រែកតាមាក់ ស្រុកខ្សាច់កណ្ដាល ក៏បើករថយន្តកៀរឲ្យចោរឈប់ ។ ពេលនោះចោរទាំង២នាក់បានដឹងខ្លួនថា ម្ចាស់គេតាមទាន់ក៏ផ្ដួលម៉ូតូចោល ហើយក៏នាំគ្នារត់គេចខ្លួនបាត់ទាំងកណ្តាលផ្លូវតែម្ដងទៅ ។
ក្រោយពេលកើតហេតុ កម្លាំងសមត្ថកិច្ចនគរបាលផ្នែកជំនាញព្រហ្មទណ្ឌ នៃអធិការដ្ឋាននគរបាលស្រុកល្វាឯម បានចុះទៅដល់ និងបានសហការជាមួយនគរបាលព្រហ្មទណ្ឌកម្រិតធ្ងន់ខេត្តកណ្ដាល បន្តធ្វើការស៊ើបអង្កេតស្រាវជ្រាវកំណត់មុខសញ្ញា ដើម្បីតាមចាប់ខ្លួនជនសង្ស័យនាំមកផ្តន្ទាទោសតាមផ្លូវច្បាប់ ។
នេះគឺជាករណីចោរដាក់ដើមឬស្សីកាត់ផ្លូវថ្នល់ស្ទាក់ប្លន់ម៉ូតូ ព្រះមិនជួយ ម្ចាស់ទូរស័ព្ទឲ្យបងប្អូនស្ទាក់ចាប់បានម៉ូតូមកវិញ សំណាងចេះរត់គេចខ្លួនទាន់ កុំជាប់ជុងក្រោមកណ្តាប់ដៃម្ចាស់ម៉ូតូ៕
