រ
កំពង់ស្ពឺ ៖ កាលពីវេលាព្រឹក ថ្ងៃទី១៤ ខែមករា ឆ្នាំ២០២១ នៅចំណុចស្រុកឱរ៉ាល់ ខេត្តកំពង់ស្ពឺ មន្ត្រីកងទ័ពពិសេសឆត្រយោង ៩១១ បានលោតឆត្រ ហើយបញ្ជាឆត្រខុសលក្ខណៈបច្ចេកទេសធ្វើឲ្យ ទាក់វ័ណ្ឌខ្សែឆត្រជាមួយគ្នា បណ្ដាលឱ្យគ្រូបង្វឹកម្នាក់ បានស្លាប់ និងមន្ត្រីម្នាក់ទៀតរង របួសធ្ងន់។
សម្តេចពិជ័យសេនា ទៀ បាញ់ បានបញ្ជាក់ប្រាប់ ពីករណីនេះថា ៖ ” លោកវរសេនីយ៍ត្រី លឹម សាយ ជាគ្រូបង្វឹកលោតឆ័ត្រយោង គឺបានពលីជីវិត ដោយសារតែឧប្បត្តិហេតុ លោតឆ័ត្រយោងព័ន្ធគ្នាទើបបណ្តាលឲ្យមានគ្រោះថ្នាក់ និងម្នាក់ទៀតរងរបួសបាក់ជើង”។
តាមការបញ្ជាក់ពីមន្ត្រីនគរបាលស្រុកឱរ៉ាល់ បានឲ្យដឹងថា ៖ ជនរងគ្រោះដែលបានស្លាប់នោះ គឺលោក វរសេនីយ៍ត្រី លឹម សាយ ជាគ្រូបង្វឹកឆត្រយោង នៃកងទ័ពពិសេសឆត្រយោង ៩១១។
ប្រភពដដែលបញ្ជាក់ទៀតថា ៖ នៅពេលលោត ពីលើយន្តហោះ ចុះមកក្រោម ឆត្ររបស់លោក វរសេនីយ៍ត្រី លឹម សាយ បានរលាស់ជាធម្មតាទេ។ ប៉ុន្តែឆត្ររបស់លោកគ្រូ លឹម សាយ បានវ័ណ្ឌគ្នាជាមួយនឹងសិស្សម្នាក់ទៀត មិនស្គាល់អត្តសញ្ញាណ ទើបបណ្ដាលឲ្យធ្លាក់មកដល់ដី រងរបួសធ្ងន់ទាំងពីរនាក់ តែជាអកុសល លោកគ្រូ លឹម សាយ បានស្លាប់នៅពេលកងកម្លាំង បញ្ជូនទៅដល់មន្ទីរពេទ្យ ចំណែកអ្នករងរបួស កំពុងសង្គ្រោះ នៅក្នុងមន្ទីរពេទ្យបង្អែក។
ពាក់ព័ន្ធនឹងករណីនេះ បញ្ជាការដ្ឋានទ័ពពិសេស បានបញ្ជាក់ឱ្យដឹង នៅរសៀលថ្ងៃដដែលនេះថា៖ កាលពីព្រឹក ថ្ងៃទី១៤ មករា នេះ លោកវរសេនីយ៍ត្រី លឹម សាយ ជាគ្រូបង្វឹកលោតឆ័ត្រយោង និងក្រុមគ្រូផ្សេងទៀតសរុប ចំនួន ១៣ នាក់ បានអនុវត្តលោតឆ័ត្របញ្ជា សម្តែងក្នុងពិធីបិទវគ្គហ្វឹកហ្វឺនកម្ម៉ង់ដូ ជំនាន់ទី១០ វគ្គហ្វឹកហ្វឺនឆ័ត្រយោង ជំនាន់ទី២៩ និងបើកវគ្គហ្វឹកហ្វឺនឆត្រយោង ជំនាន់ទី៣០ នៅសាលាហ្វឹកហ្វឺន ទ័ពពិសេសតេជោសែន ឱរ៉ាល់ ដោយលោក វរសេនីយ៍ត្រី លឹម សាយ បានខុសលក្ខណៈបច្ចេកទេស ក្នុងការបញ្ជាឆត្រ បានធ្វើអោយមានគ្រោះថ្នាក់ រងរបួសធ្ងន់ បន្ទាប់មក ត្រូវបានអង្គភាព ដឹកយកទៅសង្គ្រោះបន្ទាន់ នៅមន្ទីរពេទ្យបង្អែក ខេត្តកំពង់ស្ពឺ។ រហូតដល់វេលាម៉ោង ១២:៣០នាទី រសៀលថ្ងៃដដែល ទើបអង្គភាពទទួលបានដំណឹងថា លោកវរៈសេនីយ៍ត្រី លឹម សាយ បានពលីជីវិតទៅហើយ។
បញ្ជាការដ្ឋានទ័ពពិសេស បានបន្តថា ៖ ពេលនេះ ក្រុមគ្រួសារ បានស្នើសុំយកសពលោក ទៅធ្វើបុណ្យ តាមប្រពៃណី នៅឯស្រុកកំណើត នៅខេត្តកំពង់ឆ្នាំង៕
