ភ្នំពេញ៖ មានហេតុការណ៍ដ៏គួរឱ្យភ្ញាក់ផ្អើលមួយបានកើតឡើង ខណៈដែលក្មេងស្រីអាយុទើប៨ឆ្នាំម្នាក់ បានយកខ្សែមកចង”ក”លេង ភ្ជាប់នឹងបង្កាន់ដៃជណ្តើរតែអកុសល បានរអិលជើងធ្លាក់មកក្រោម ធ្វើឲ្យខ្សែរឹត”ក”ប្រកាច់ត្រដរខ្យល់ ត្រូវបានក្រុមគ្រួសារប្រទះឃើញ ប្រញាប់ស្រាយខ្សែចេញ ហើយដឹកបញ្ជូនទៅសង្គ្រោះនៅមន្ទីរពេទ្យគន្ធបុប្ផាភ្លាមៗផងដែរ។
ករណីខាងលើនេះ បានកើតឡើង កាលពីវេលាម៉ោង ១និង១៥នាទីរសៀល ថ្ងៃទី១៤ ខែមករា ឆ្នាំ២០២១ នៅភូមិព្រៃកី សង្កាត់ភ្លើងឆេះរទេះ ខណ្ឌកំបូល។
យោងតាមការឱ្យដឹងពីខាងសមត្ថកិច្ចបានបញ្ជាក់ថា ក្មេងស្រីរងគ្រោះ ឈ្មោះ អូន អាលីណា អាយុ៨ឆ្នាំ រស់នៅជាមួយជីដូន នៅផ្ទះកើតហេតុខាងលើ ។ ហើយមុនកើតហេតុ ក្មេងស្រីរងគ្រោះ លេងតែម្នាក់ឯងនៅផ្ទះជាន់លើ ចំណែកស្ត្រីជាជីដូនរវល់តែនៅផ្ទះជាន់ក្រោម រហូតដល់ឮសូរសំឡេង ត្រដរខ្យល់ទើបស្ត្រីជាជីដូនរត់ឡើងទៅមើល ឃើញចៅស្រីចង”ក”ជាប់នឹងបង្កាន់ដៃជណ្តើរ ទើបស្រែកឆោឡោឡើង ហើយបានស្រាយខ្សែរដឹកយកទៅគ្លីនិក តែដោយសារសា្ថនភាពក្មេងរងស្រីរងគ្រោះធ្ងន់ធ្ងរពេក ទើបគ្រូពេទ្យនៅទីនោះ មិនហ៊ានទុកព្យាបាល ក៏ប្រាប់ឲ្យក្រុមគ្រួសារ ដឹកបញ្ជូនទៅសង្គ្រោះនៅមន្ទីរពេទ្យគន្ធបុប្ផា ៕
