កំពត ៖ មានការភ្ញាក់ផ្អើលកើតឡើងខណៈមនុស្ស២នាក់បានស្លាប់ដោយសារចរន្តអគ្គិសនីឆក់ អំឡុងពេលចុះទៅជញ្ជាត់ត្រីក្រឹមក្នុងស្រះ ដែលមានរាយខ្សែភ្លើងក្នុងទឹក ដោយហេតុការណ៍នេះបានកើតឡើងនៅវេលាម៉ោង១១ និង២០នាទីព្រឹក ថ្ងៃទី១៦ ខែមករា ឆ្នាំ២០២១ ត្រង់ចំណុចស្រះទឹកមួយកន្លែង ស្ថិតក្នុងភូមិត្រពាំងនៀល ឃុំឫស្សីស្រុកខាងលិច ស្រុកកំពង់ត្រាច ខេត្តកំពត។
យោងតាមប្រភពព័ត៌មានពីសមត្ថកិច្ចបានឲ្យដឹងថា កាលពីវេលាដូចខាងលើ មានបុរស៣នាក់ យកឈ្នាងទៅរកជញ្ជាត់ត្រីក្រឹមក្នុងស្រះទឹកខាងលើ ប៉ុន្តែពេលខ្សែភ្លើងឆក់គឺស្លាប់តែ២នាក់ ឯម្នាក់រួចខ្លួន ហើយករណីបណ្តាលឲ្យមានមនុស្សស្លាប់នេះ ដោយសារក្នុងទឹកស្រះមានគេរាយខ្សែភ្លើងដាក់ចោលនៅទីនោះដោយអ្នកចុះទឹកស្រះមិនបានដឹង ទើបធ្វើឲ្យមានរឿងរ៉ាវដ៏រន្ធត់កើតឡើងតែម្តង។
សមត្ថកិច្ចបានបន្តទៀតថា ជនរងគ្រោះដែលស្លាប់ក្នុងហេតុការណ៍នោះ ទី១-ឈ្មោះ ទុំ ធារ៉ា ភេទប្រុស អាយុ២៣ឆ្នាំ,ទី២-ឈ្មោះ បៀ ថៃ ភេទប្រុស អាយុ២២ឆ្នាំ ទាំងពីរនាក់មានទីលំនៅភូមិលក(ផ្សារក្រោម) ឃុំឫស្សីខាងលិច ស្រុកកំពង់ត្រាច ខេត្តកំពត។ដោយឡែកបុរសម្នាក់ដែលបានរួចផុតជីវិត ឈ្មោះ ប្រេង លិត ភេទប្រុស អាយុ២២ឆ្នាំ រស់នៅភូមិលក ឃុំឫស្សីខាងលិច ស្រុកកំពង់ត្រាច ខេត្តកំពត។
បច្ចុប្បន្នសពជនរងគ្រោះក្រោយពីជំនាញធ្វើកោសល្យវិច័យរួចរាល់ ត្រូវបានសមត្ថកិច្ចប្រគល់ជូនក្រុមគ្រួសារដើម្បីចាត់ចែងធ្វើបុណ្យតាមប្រពៃណី។
គួរកត់សម្គាល់ដែរថា ចំណុចដែលមានដាក់រាយខ្សែភ្លើងក្នុងស្រះទឹកបណ្តាលឲ្យមានមនុស្សស្លាប់២នាក់ខាងលើ កន្លងមកជាកន្លែងដាក់ស្តុកជ្រូកសម្រាប់នាំចេញទៅប្រទេសវៀតណាម ប៉ុន្តែដោយសារស្ថានភាពជំងឺកូវីដ ១៩ រាតត្បាតត្រូវបានផ្អាកដំណើរការ ហើយទីតាំងនេះត្រូវម្ចាស់គេទុកចោលដោយគ្មានអ្នកណាមើលការខុសត្រូវឡើយ លុះមានអ្នកភូមិចុះទឹកស្រះស្រាប់តែកើតមានរឿងរ៉ាវដ៏រន្ធត់តែម្តង។ចំពោះករណីដែលម្ចាស់ទីតាំងបានដាក់រាយខ្សែភ្លើងក្នុងទឹកបែបនេះគេមិនទាន់ដឹងថា អាចពាក់ព័ន្ធនឹងបទល្មើសយ៉ាងណានោះទេ៕ សេង ណារិទ្ធ
