ខេត្តព្រះសីហនុ-មានករណីផ្ទុះអាវុធពីជនសង្ស័យជាជនជាតិចិន បានធ្វើសកម្មភាពបាញ់ប្រហារបុរសជនជាតិចិនដូចគ្នា បណ្ដាលឲ្យម្នាក់ស្លាប់ វេលាម៉ោង៨,២០នាទីព្រឹក ថ្ងៃទី២១ ខែមករា ឆ្នាំ២០២១នេះ នៅ ព្រៃស្វា ក្បែរ ឆ្នេរ ឯករាជ្យ ជិតកាស៊ីណូ ជីយវនីសិន ស្ថិតក្នុងក្រុម១៩ ភូមិ១សង្កាត់លេខ៣ក្រុងព្រះសីហនុ ខេត្តព្រះសីហនុ។
ជុំវិញហេតុការណ៍ផ្ទុះអាវុធនេះផងដែរតាមប្រភព ពីសន្តិសុខកាស៊ីណូជីយវនីសិន បានអោយដឹងថា នៅមុនកើតហេតុ ខណៈពេលរូបគាត់កំពុងយាមនៅមុខកាស៊ីណូ បានឬសំលេងផ្ទុះអាវុធ ចំនួន ៣~៤ គ្រាប់ នៅចម្ងាយពី២០០~៣០០ពីកាស៊ីណូ ហើយក៍បានឃើញរថយន្តម៉ាក Rang Rover ពណ៌ខ្មៅ ពាក់ផ្លាកលេខភ្នំពេញ2AL-9459បើកចូលមកកាស៊ីណូ ក្នុងបំណងរត់គេចពីការបាញ់ប្រហារ ភ្លាមនោះក៏មានរថយន្តមួយគ្រឿងទៀតម៉ាកម៉ាក Ford Ranger Rapter ពណ៌ខ្មៅ ពាក់ផ្លាកលេខភ្នំពេញ2BI-1413 បើកមកឈប់ពីមុខកាស៊ីណូ ហើយបានបាញ់មួយគ្រាប់ទៀតមកលើរថយន្តជនរងគ្រោះ រួចក៍បើកចេញបាត់ទៅ ភ្លាមនោះតៃកុងរថយន្តជាជនជាតិខ្មែរ ក៏បានគ្រាជនរងគ្រោះពីរថយន្តដាក់ក្បែររថយន្ត រួចក៍ដឹកបន្តមកកាន់មន្ទីពេទ្យ។
ជុំវិញករណីនេះផងដែរ លោកឧត្តមសេនីយ៍ទោ ជួន ណារិន្ទ មានប្រសាសន៍ប្រាប់បណ្ដាញផ្សព្វផ្សាយ ឲ្យដឹងជាបឋមថា ក្រោយកើតហេតុ លោកស្នងការបានបញ្ជាកម្លាំងជំនាញ ដោយមានកិច្ចសហការពីសមត្ថកិច្ចចម្រុះក្នុងគណៈបញ្ជាការឯកភាពរដ្ឋបាលខេត្ត ឡោមព័ទ្ធទីតាំងកើតហេតុ និងស្រាវជ្រាវតាមចាប់ខ្លួនជនបង្ក ក្នុងនោះរបាយការណ៍បឋមបញ្ជាក់ថា ជនរងគ្រោះជាជនជាតិចិន ជិះរថយន្ដមួយគ្រឿង ម៉ាក Rang Rover ពណ៌ខ្មៅ ពាក់ផ្លាកលេខភ្នំពេញ2AL-9459។
បើតាមលោកឧត្តមសេនីយ៍ទោ ជួន ណារិន្ទ បន្ថែមថា ជនសង្សយ័ដែលធ្វើសកម្មភាពបាញ់ប្រហារនេះ ជិះរថយន្ដមួយគ្រឿងដែលក្រោយមក យករថយន្តនោះទៅទុកផ្លុងចោលនៅជិតផ្សារដំរី៥ ហើយចុះរត់គេចខ្លួន ក្នុងនោះខ្មាន់កាំភ្លើងជិះរថយន្ដម៉ាក Ford Ranger Rapter ពណ៌ខ្មៅ ពាក់ផ្លាកលេខភ្នំពេញ2BI-1413។
យ៉ាងណាមិញ លោកឧត្តមសេនីយ៍ស្នងការ បានអះអាងថា កម្លាំងជំនាញកំពុងតាមប្រមាញ់ខ្មាន់កាំភ្លើងយ៉ាងយកចិត្ដទុកដាក់ ដើម្បីចាប់ខ្លួនមកផ្ដន្ទាទោសតាមច្បាប់។
ទោះបីជាយ៉ាងណា លោកឧត្តមសេនីយ៍ទោ ជួន ណារិន្ទ មិនទាន់អាចបញ្ជាក់ថា ដើមចមដែលនាំឲ្យមានអំពើបាញ់ប្រហារទាំងព្រឹកព្រលឹមនេះ បណ្ដាលមកពីមូលហេតុអ្វីនោះឡើយទេ សមត្ថកិច្ចកំពុងធ្វើការស្រាវជ្រាវបន្ត។
ដោយឡែក លោកវរសេនីយ៍ឯក សារ៉ាត់វិទ្យា ប្រធានការិយាល័យ វិទ្យាសាស្ត្រ បច្ចេកទេស ពិនិត្យសាកសព បានឲ្យដឹង ក្រោយធ្វើកោសល្យវិច័យថា ជនរងគ្រោះ ត្រូវបានខ្មាន់កាំភ្លើង បាញ់មួយគ្រាប់ ចំលើគល់ដោះខាងឆ្វេងទំហ៊ំ៩ មិលីម៉ែត្រ បណ្តាលឲ្យស្លាប់ ក្រោយបញ្ជូន មកដល់មុខមន្ទីរពេទ្យ ឯកជន មួយកន្លែង ស្ថិតក្បែរផ្សារពាណិជ្ជកម្ម តាមបណ្ដោយផ្លូវ ឯករាជ្យ។ក្រោយការពិនិត្យរួចរាល់ហើយ សាកសពត្រូវបានបញ្ជូនទៅកាន់រាជធានីភ្នំពេញ៕
