ភ្នំពេញ ៖ យុវជនម្នាក់ បានបាត់បង់ជីវិតភ្លាមៗ និងយុវជនម្នាក់ទៀត រងរបួសធ្ងន់ បន្ទាប់ពីជួបគ្រោះថ្នាក់ចរាចរ រវាងម៉ូតូនិងម៉ូតូ កាលពីវេលា ម៉ោង១២និង៥០នាទី យប់រំលងអធ្រាត្រ ឈានចូល ថ្ងៃព្រហស្បតិ៍ ទី២១ ខែមករា ឆ្នាំ២០២១ ត្រង់ចំណុចច្រកចូល ផ្សារច្រាំងចំរេះ តាមបណ្ដោយផ្លូវជាតិ លេខ៥ ក្នុងភូមិឃ សង្កាត់ច្រាំងចំរេះទី២ ខណ្ឌឫស្សីកែវ រាជធានីភ្នំពេញ ។
ភាគីទាំងសងខាង មិនត្រូវបានស្គាល់ អត្តសញ្ញាណដូចគ្នា ដោយភាគីដែលស្លាប់ ជិះម៉ូតូម៉ាកឌ្រីមសង់ ស៊េរីឆ្នាំ២០១៩ ពណ៌ខ្មៅ ពាក់ស្លាកលេខ ភ្នំពេញ 1HN-4437 ចំណែកឯភាគីម្ខាងទៀត ជិះម៉ូតូម៉ាកឌ្រីមសង់ ស៊េរីឆ្នាំ២០១៨ ពណ៌ខ្មៅ ពាក់ស្លាកលេខរតនគិរី1E-6242 រងរបួសធ្ងន់បាក់ដៃ ។ ភាគីទាំងសងខាង មិនត្រូវបានស្គាល់ អត្តសញ្ញាណដូចគ្នា ។
តាមប្រភពបានប្រាប់ឲ្យដឹងថា ដំបូងឡើយ គាត់ឃើញយុវជន ដែលរងរបួសធ្ងន់នោះ បើកម៉ូតូម្នាក់ឯងតាមបណ្តោយផ្លូវជាតិ លេខ៥ទិសដៅពីត្បូងទៅជើង ខណៈ មកដល់ចំណុចកើតហេតុ ក៏បត់ឆ្វេងដៃ បំណងចូលទៅ ច្រកផ្សារច្រាំងចំរេះ ខណៈពេលកំពុងតែបត់ស្រាប់តែមានម៉ូតូ របស់យុវជនដែលស្លាប់នោះ មកពីក្រោយ ទំនង( អកហ្សើ ) ជ្រុលមកបុកពេញទំហឹង បណ្ដាល ឱ្យមានអ្នកស្លាប់និងអ្នករងរបួសបែបនេះតែម្ដង ។
ក្រោយពីកើតហេតុ សមត្ថកិច្ចវាស់វែង យកម៉ូតូទាំងពីរគ្រឿង ទៅរក្សាទុក រង់ចាំដោះស្រាយគ្នា នៅពេលក្រោយចំណែកសពតម្កល់នៅវត្តទឹកថ្លា រង់ចាំស្រាវជ្រាវ សាច់ញាតិ មកទទួលយកទៅធ្វើបុណ្យ តាមប្រពៃណី៕
