ខេត្តបន្ទាយមានជ័យ ៖ បុរស២នាក់ជិះម៉ូតូមួយគ្រឿងឌុបគ្នាសង្ស័យបើកបរក្នុងល្បឿនលឿន លុះដល់ចំណុចផ្លូវកោងក៏ជ្រុលបុកជាមួយរថយន្ត បណ្តាលឱ្យម្នាក់បាត់បង់ជីវិតខ្ទាតទើរជាប់នៅលើក្បាលរថយន្ត និងចំណែកម្នាក់ទៀតបានរងរបួសធ្ងន់ ។
ហេតុការណ៍ខាងលើនេះបានកើតឡើងកាលពីវេលាម៉ោង៥ល្ងាចថ្ងៃទី២២ ខែមករា ឆ្នាំ២០២១ តាមបណ្តោយផ្លូវ ក្នុងភូមិអន្លងថ្ងាន់ ឃុំបត់ត្រង់ ស្រុកមង្គលបូរី ខេត្តបន្ទាយមានជ័យ ។
តាមប្រភពពីមន្ត្រីចរាចរណ៍នៃស្នងការដ្ឋាននគរបាលខេត្តបន្ទាយមានជ័យបានប្រាប់ឱ្យដឹងថា ជនរងគ្រោះទាំង២នាក់ខាងលើ ក្នុងនោះម្នាក់ឈ្មោះ រឿង រ៉ាវុធ ភេទប្រុស អាយុ៣០ឆ្នាំ រស់នៅភូមិត្រសេកជុំ ឃុំម៉ាឡៃ ស្រុកម៉ាឡៃ បានបាត់បង់ជីវិត និងម្នាក់ទៀតដែលរងរបួសធ្ងន់ឈ្មោះ គល់ ផានី ភេទប្រុស អាយុ២៩ឆ្នាំ រស់នៅភូមិរង្វាន់លិច ឃុំចំណោម ស្រុកមង្គលបូរី ខេត្តបន្ទាយមានជ័យ ។ ជនរងគ្រោះទាំង២នាក់ជិះម៉ូតូមួយគ្រឿងម៉ាកហុងដាឌ្រីម ពាក់ផ្លាកលេខ បន្ទាយមានជ័យ 1B-1503 ។ ដោយឡែករថយន្តមួយគ្រឿងខាងលើម៉ាកនីស្សាន់ អ្នកបើកបរមិនស្គាល់អត្តសញ្ញាណ ។
តាមប្រភពខាងលើបានបញ្ជាក់ថា មុនពេលកើតហេតុ គេឃើញជនរងគ្រោះទាំង២នាក់ខាងលើជិះម៉ូតូមួយគ្រឿងឌុបគ្នាធ្វើដំណើរក្នុងទិសដៅពីជើងមកត្បូង ក្នុងល្បឿនលឿនលុះមកដល់ចំណុចកើតហេតុខាងលើដែលជាផ្លូវកោង ក៏ជ្រុលទៅបុកជាមួយរថយន្តមួយគ្រឿងយ៉ាងពេញទំហឹងកំពុងធ្វើដំណើរក្នុងទិសដៅបញ្ច្រាសពីត្បូងមកជើង បណ្តាលឱ្យបុរសម្នាក់បាត់បង់ជីវិតខ្ទាតទើរជាប់នៅលើក្បាលរថយន្ត ចំណែកម្នាក់ទៀតរងរបួសធ្ងន់ត្រូវបានបញ្ជូនទៅសង្គ្រោះបន្ទាន់។ ដោយឡែករថយន្តនិងម៉ូតូបានរងការខូចខាតយ៉ាងដំណំដូចគ្នា ។
តាមប្រភពបានបញ្ជាក់បន្តថា មូលហេតុកើតឡើង គឺបណ្តាលមកពីជនរងគ្រោះទាំង២នាក់ជិះម៉ូតូឌុបគ្នា ក្នុងល្បឿនលឿននៅចំណុចផ្លូវកោង ទើបបណ្តាលឱ្យបុករថយន្តនៅពីមុខយ៉ាងពេញទំហឹង បណ្តាលឱ្យមានអ្នកបាត់បង់ជីវិត និងរងរបួសធ្ងន់បែបនេះ ។
ក្រោយពេលកើតហេតុ សមត្ថកិច្ចបានចុះធ្វើការវាស់វែង និងប្រគល់សពជូនសាច់ញាតិដើម្បីយកទៅធ្វើបុណ្យតាមប្រពៃណី ដោយឡែករថយន្តនិងម៉ូតូត្រូវបានសមត្ថកិច្ចយកទៅរក្សាទុកការិយាល័យនគរបាលចរាចរណ៍ខេត្ត ដើម្បីរង់ចាំធ្វើការដោះស្រាយនៅពេលក្រោយទៀត ៕
