ខេត្តបន្ទាយមានជ័យ÷យុវជនចិត្តខ្លាំងម្នាក់ខឹងម្តាយស្តីបន្ទោសឲ្យបន្តិចបន្ទួច ផ្ទុះកំហឹងយកគម្របធុងទឹកមកគប់ទៅលើម្ដាយបណ្ដាលឲ្យរបួសធ្ងន់ លើផ្ទៃមុខ និងដុតខោអាវខ្ទេច ត្រូវបានអាវុធហត្ថ១ក្រុមដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានអាវុធហត្ថ ក្រុងប៉ោយប៉ែត ចុះទៅដល់កន្លែងកើតហេតុ ឃាត់ខ្លួនជនសង្ស័យ ឈ្មោះ ភ័ណ និត (ហៅ ជ្រូក) យកមកមូលដ្ឋានអាវុធហត្ថក្រុង ដើម្បីសួរនាំ។
នៅល្ងាចថ្ងៃទី៣១ ខែមករា ឆ្នាំ២០២១ ស្ថិតក្នុងភូមិសាមគ្គីមានជ័យ សង្កាត់ប៉ោប៉ែត ក្រុងប៉ោយប៉ែត ខេត្តបន្ទាយមានជ័យ។
លោកវរសេនីយ៍ត្រី នួន នីនីណារ៉ូបានប្រាប់ឲ្យដឹងថា ម្តាយជនរងគ្រោះ ឈ្មោះ ដាំ ម៉ៅ អាយុ៥៣ឆ្នាំ រស់នៅក្នុងភូមិសាមគ្គីមានជ័យ សង្កាត់ប៉ែត ក្រុងប៉ោយប៉ែត ខេត្តបន្ទាយមានជ័យ។
លោកបានបញ្ជាក់ឲ្យដឹងថា ជនសង្ស័យមិនដឹងខឹងរឿងអីក្រោយពេលហូបបាយរួចខ្លួនបានប្រមូលខោអាវរបស់ខ្លួន និងខោអាវ របស់ប្អូនខ្លួនដុតចោលអស់នៅពេលនោះ ម្ដាយបានស្ដីបន្ទោសនិងជេរស្រាប់តែជនសង្ស័យ ផ្ទុះកំហឹងខ្លាំងបានយកគម្របធុងទឹក គប់ទៅលើម្ដាយរបស់ខ្លួន បណ្ដាលឲ្យរងរបួសធ្ងន់ លើផ្ទៃមុខ ហើយជាំភ្នែក ខាងឆ្វេងទៀតផង។
ក្រោយពីកើតហេតុ ម្តាយទៅដាក់ពាក្យប្តឹងលោកវរសេនីយ៍ត្រី នួន នីណារ៉ូ បានដឹកនាំកម្លាំងចុះទៅដល់កន្លែងកើតហេតុ ហើយឃាត់ខ្លួនជនសង្ស័យ ឈ្មោះ ភ័ណ និត (ហៅ ជ្រូក) យកមកមូលដ្ឋានអាវុធហត្ថក្រុង ដើម្បីសួរនាំ។
នៅមុខអាវុធហត្ថជនសង្ស័យបានឆ្លើយសារភាពថាខ្លួនមួម៉ៅខ្លាំងអារឿងដើរលេងក៏ដុតខោអាវប្អូនចោលហើយម្តាយជេរទៀតរឹតតែខឹងខ្លាំងបានស្ទុះ ទៅច្របាច់ ក ម្ដាយថែមទៀត។ដោយផ្អែកលើចម្លើយសារភាព និងយោងតាមពាក្យបណ្ដឹង ព្រមទាំងមានស្នាកស្នាម ជាំលើមុខជនរងគ្រោះ ទើបកម្លាំងការិយាល័យ បទល្មើសព្រហ្មទណ្ឌ អាវុធហត្ថខេត្ត កសាងសំណុំរឿង បញ្ជូនជនសង្ស័យ ទៅសាលាដំបូងខេត្ត ចាត់ការតាមច្បាប់៕
