ចិន ÷ សហរដ្ឋអាមេរិកបានប្រកាសពីការរកឃើញវ៉ាក់សាំងប្រឆាំងនឹងវីរុសកូរ៉ូណា ខណៈនៅឯប្រទេសចិន មានមនុស្សស្លាប់ដោយសារវីរុសផ្លូវដង្ហើម កូរ៉ូណា (Coronavirus) នេះ បានកើនឡើងដល់ ១៧០នាក់ និងមនុស្សជាង ៧ ៧០០នាក់ទៀតបានឆ្លងជំងឺនេះ។ នេះបើតាមសារព័ត៌មាន CNA នាព្រឹកថ្ងៃទី៣០ ខែមករា ឆ្នាំ២០២០។
បើតាមអាជ្ញាធរនៃខេត្តហ៊ូប៉ី (Hubei) និងទីក្រុងអ៊ូហាន (Wuhan) ដែលជាចំណុចចាប់ផ្តើម នៃការផ្ទុះវីរុសកូរ៉ូណា បានឲ្យដឹងកាលពីម្សិលមិញថា មនុស្សសរុបចំនួន ១៦២នាក់បានស្លាប់ ក្នុងតែខេត្តមួយនេះប៉ុណ្ណោះ និងមានអ្នកឆ្លង ៤ ៥៨៦ករណី ប៉ុន្តែបន្ទាប់ពីទទួលការព្យាបាល មានអ្នកជំងឺចំនួន ១២៨នាក់ បានធូរស្បើយពីជំងឺទូទាំងប្រទេសចិន។
គួរបញ្ជាក់ថា អាមេរិក បានប្រកាសនៅថ្ងៃអង្គារ នេះ ថា ខ្លួនកំពុងតែអភិវឌ្ឍន៍វ៉ាក់សាំងប្រឆាំងនឹងវីរុសមរណៈ ដែលបានផ្ទុះនៅក្នុងប្រទេសចិន និងបានជំរុញឲ្យទីក្រុងប៉េកាំង បង្កើនកិច្ចសហប្រតិបត្តិការជាមួយនឹងអាជ្ញាធរសុខភាពអន្តរជាតិ WHO ។
មន្រ្តីសុខាភិបាលអាមេរិក ឈ្មោះ Anthony Fauci បានថ្លែងប្រាប់អ្នកសារព័ត៌មានថា “ពួកយើងបានចាប់ផ្តើមវាហើយនៅវិទ្យាស្ថានសុខាភិបាលជាតិ ជាមួយអ្នកសហការជាច្រើន ដើម្បីអភិវឌ្ឍន៍វ៉ាក់សាំង”។
ដំណើរការនឹងត្រូវការរយៈពេល ៣ខែដើម្បីចាប់ផ្តើមការសាកល្បងលើកដំបូង និង ៣ខែទៀតដើម្បីប្រមូលទិន្នន័យ មុនពេលចាប់ផ្តើមអនុវត្តន៍នៅដំណាក់កាលទី២ បាន។
សូមបញ្ជាក់ថា វីរុសកូរ៉ូណា ដែលបានផ្ទុះចេញពីទីក្រុងវូហាន ប្រទេសចិន បានសម្លាប់ជីវិតមនុស្សចំនួន ១៧០នាក់ និងឆ្លងជិត ៨.០០០ករណីរហូតមកដល់ពេលនេះ។
ទោះជាយ៉ាងនេះក្តី រដ្ឋាភិបាលចិន មិនបានឆ្លើយតបជាមួយនឹងការអំពាវនាវរបស់សហរដ្ឋអាមេរិកទេ ហើយនៅតែបង្ហាញជំនឿចិត្តរបស់ខ្លួនថា អាចគ្រប់គ្រង និងយកឈ្នះលើវីរុសដ៏កាចសាហាវនេះបាន៕
