ខេត្តព្រះសីហនុ៖ មានពលរដ្ឋច្រើននាក់នាំគ្នាតវ៉ាដោយហិង្សា រុះរើរបាំង(រោងកុងត្រូល)ដែលក្រុមហ៊ុន យិះ ជៀ របស់ចិន ដាក់បិទនៅតាមផ្លូវចូលទៅកាន់ឆ្នេរកោះសំពោចក្នុងឃុំរាមស្រុកព្រៃនប់ ខេត្តព្រះសីហនុ ជាកន្លែងដែលក្រុមហ៊ុនចិនទទួលសិទ្ធិវិនិយោគនៅតំបន់នោះ ហើយក៏បង្កឲ្យជនជាតិចិនម្នាក់រងរបួសស្រាលផងដែរ។
ហេតុការណ៍នេះកើតឡើងកាលពីរសៀលថ្ងៃទី១៧ កក្កដា ២០១៩ ម្សិលមិញនេះ ដែលក្នុងហេតុការណ៍នេះមានសេចក្តីរាយការណ៍ជាបឋមមកថា មានបុរសជនជាតិចិនម្នាក់បានរងរបួស ហើយមានពលរដ្ឋមួយចំនួនត្រូវបានសមត្ថកិច្ចឃាត់ខ្លួនជាបណ្តោះអាសន្នដើម្បីសាកសួរ ក្រោយពេលដែលអជ្ញាធរនិងសមត្ថកិច្ចចម្រុះចុះអន្តរាគមន៍និងទប់ស្កាត់ការពារមិនអោយមានអំពើហឹង្សាធ្ងន់ធ្ងរបន្ថែមទៀត ប៉ះពាល់ដល់ផ្លូវច្បាប់ និងបានបន្តការដោះស្រាយតាមនិតិវិធី។
បើតាមប្រភពពីមន្ត្រីមូលដ្ឋានឃុំរាមស្រុកព្រៃនប់ថ្លែងថា ករណីពលរដ្ឋផ្ទុះការតវ៉ាឈានដល់មានការរុះរើរបាំងកុងត្រូលនេះ ដោយសារពលរដ្ឋមានកំហឹងជាមួយខាងក្រុមហ៊ុនចិនយិះ ជៀ ដែលដាក់របាំងកុងត្រូលបង្កផលពិបាកដល់ពលរដ្ឋដែលមានលំនៅដ្ឋានប៉ែកខាងក្នុង ពេលចេញចូលផ្ទះម្តងៗ និងថាកន្លងមកប្រជាពលរដ្ឋបានស្នើសុំអោយក្រុមហ៊ុនបើកផ្លូវអោយពួកគាត់ងាយស្រួលធ្វើដំណើរតាមសម្រួលដែរ ប៉ុន្តែគ្មានដំណោះស្រាយ។
ចំពោះពលរដ្ឋពាក់ពន្ធ័ចំនួន៤រូបដែលសមត្ថកិច្ចឃាត់ខ្លួនបណ្តោះអាសន្នក្រោយផ្ទុះហឹង្សានេះរួមមាន៖
ទី១.ឈ្មោះ រឿង វិស័យ ភេទប្រុស អាយុ៤៤ឆ្នាំមុខរបរកម្មករសំណង់ មានទីលំនៅភូមិកណ្តាលទួល ឃុំដើមចារ ស្រុកកំពង់ត្រាច ខេត្តកំពត។
ទី២.ឈ្មោះ ហ៊ុយ យ៉េត ភេទប្រុស អាយុ២៥ឆ្នាំ មុខរបរជាងភ្លើង មានទីលំនៅភូមិថ្មធំ ឃុំរាម ស្រុកព្រៃនប់ ខេត្តព្រះសីហនុ។
ទី៣.ឈ្មោះ កែវ សឹង ភេទប្រុស អាយុ៦៣ឆ្នាំ មុខរបរធ្វើស្រែ មានទំនៅភូមិថ្មធំ ឃុំរាម ស្រុកព្រៃនប់ ខេត្តព្រះសីហនុ ។
ទី៤.ឈ្មោះ ឈឹម គឹមយូន ភេទ ប្រុស អាយុ៣០ឆ្នាំមុខរបរលក់ដូរ មានទីលំនៅភូមិស្មាច់ដែង ឃុំរាម ស្រុកព្រៃនប់ ស្រុកព្រៃនប់ ខេត្តព្រះសីហនុ។
គេនៅមិនទាន់ដឹងថាវាសនាពលរដ្ឋទាំង៤នាក់នោះយ៉ាងណានោះឡើយ។ បើតាមប្រសាសន៍លោក ស កក្កដា អភិបាលស្រុកព្រៃនប់ បាបានបញ្ជាក់ថា ពលរដ្ឋដែលសមត្ថកិច្ចឃាត់ខ្លួននោះគឺ សមត្ថកិច្ចកំពុងធ្វើការសួរនាំតាមនិតិវិធីនៅឡើយរហូតមកដល់យប់ម៉ោង ៨ ថ្ងៃទី ១៧ ខែកក្កដា។
ជុំវិញនិងរឿងនេះយើងមិនទាន់មានរបាយការណ៍ណាមួយបញ្ជាក់ឲ្យបានច្បាស់លាស់ រវាងពលរដ្ឋអ្នកធ្វើដំណើរដែលរងផលប៉ះពាល់ឡើយ ដោយពលរដ្ឋកំពុងតែរង់ចាំមើលចំណាប់ការរបស់អាជ្ញាធរស្រុកនិងដោះស្រាយជូនពលរដ្ឋពាក់ព័ន្ធរឿងកុងត្រូលនេះនៅឡើយទេ៕ដោយHN
