ខេត្តព្រះសីហនុ ៖ អភិបាលនៃគណៈអភិបាល ខេត្តព្រះសីហនុ ឯកឧត្តម គួច ចំរើន នារសៀលថ្ងៃច័ន្ទ ទី១៩ ខែតុលា ឆ្នាំ២០២០នេះ បានអនុញ្ញាតឱ្យក្រុមរត់ដើម្បីសប្បុរសធម៌ ប្រមូលថវិកាយកទៅជួយឧបត្ថម្ភដល់មន្ទីរពេទ្យកុមារអង្គរ ខេត្តសៀមរាប ចូលជួបសំដែងការគួរសមនៅសាលាខេត្តព្រះសីហនុ។
លោក អ៊ួន បឋម ប្រធានក្រុមយុវជនរត់ម៉ារ៉ាតុងបានឱ្យដឹងថាការរត់ដើម្បីសប្បុរសធម៌នេះត្រូវឆ្លងកាត់ ២១ខេត្ត-ក្រុង ទូទាំងប្រទេស ដែលមានប្រវែងផ្លូវ ២,៤០០គីឡូម៉ែត្រ ក្នុងរយៈពេល ៩៩ថ្ងៃ ដោយចាប់ផ្តើមចេញដំណើរពីរាជធានីភ្នំពេញ ឆ្លងកាត់ខេត្តកំពង់ស្ពឺ តាកែវ កំពត ខេត្តព្រះសីហនុ និងបន្តទៅកាន់ខេត្តគោលដៅផ្សេងទៀត ក្នុងគោលបំណង៖
១-រ៉ៃអង្គាសថវិកាជួយដល់មន្ទីរពេទ្យកុមារអង្គរ ខេត្តសៀមរាប
២-ប្រើប្រាស់ផ្លូវ ផ្សព្វផ្សាយដល់ប្រជាពលរដ្ឋឲ្យចូលរួមគោរពច្បាប់ចរាចរណ៍
៣-ផ្សព្វផ្សាយអោយប្រជាពលរដ្ឋចូលរួមថែរក្សាបរិស្ថាន និងទុកដាក់សំរាមដោយខ្លួនឯង
៤-ឱ្យយុវជនចូលរួមក្នុងការងារសង្គមទាំងអស់គ្នា។
៥-ចង់ឲ្យយុវជនយល់ថាសង្គមនេះជារបស់យើងទាំងអស់គ្នាដូចនេះត្រូវរួមគ្នាថែរក្សានិងការពារ។
អភិបាលខេត្តព្រះសីហនុ ឯកឧត្តម គួច ចំរើន បានមានប្រសាសន៍ស្វាគមន៍ ចំពោះក្រុមយុវជន ដែលមានគំនិតផ្តួចផ្តើមរត់ចម្ងាយ គៀងគរ ថវិកាជួយដល់មន្ទីរពេទ្យកុមារអង្គរ ខេត្តសៀមរាប ក្នុងនាមរដ្ឋបាលខេត្ត សូមកោតសរសើរនូវគំនិតរៀបចំប្រកបដោយឆន្ទៈ ក្នុងការគៀរគរថវិកា ការអប់រំតាមដងផ្លូវ ស្ដីពីច្បាប់ចរាចរណ៍ សំរាម និងបរិស្ថាន។ រដ្ឋបាលខេត្តក៏បានជួយផ្សព្វ ផ្សាយដល់សប្បុរសជនក្នុងខេត្តដើម្បីចូលរួមបរិច្ចាកថវិកាផ្ទាល់ខ្លួន ជាពិសេសធ្វើឱ្យយុវជនយើងមានការយល់ដឹងកាន់តែច្រើនកាត់បន្ថយនូវគ្រោះថ្នាក់ចរាចរណ៍ ការ បោះចោលសំរាម និងបញ្ហាបរិស្ថានជាដើម។ឯ
កឧត្តម បាន បន្តថា គំនិតផ្តួចផ្តើមគៀងគរថវិកាជួយដល់មន្ទីរពេទ្យកុមារអង្គរ ខេត្តសៀមរាប មានសារៈសំខាន់ ហើយជឿជាក់ថា ការប្ដេជ្ញាចិត្តរបស់ក្មួយៗ នឹងទទួលបានជោគជ័យរួមចំណែកជួយដល់កុមារកម្ពុជា ហើយជាការងារជួយដល់សង្គម។ យុវជន និងពលរដ្ឋរបស់យើងក្នុងក្របខណ្ឌទូទាំងប្រទេសកាន់តែយល់ដឹង និងជួយគាំទ្រកាន់តែច្រើនបន្ថែមទៀត។
ក្នុងឱកាសនោះ រដ្ឋបាលខេត្តព្រះសីហនុ បានចូលរួមបរិច្ចាកថវិកា ១០លានរៀល និងសប្បុរសជនក្នុងខេត្ត ក៏បានចូលរួមថវិកាមួយចំនួនទៀតដល់ក្រុមយុវជនរត់ម៉ារ៉ាតុង ដើម្បីរួមចំណែកក្នុងសកម្មភាពសប្បុរសធម៌នេះផងដែរ៕ ដោយ មនោរាហ៍
