ខេត្តកំពង់ចាម ៖ លោក ហ៊ុន ម៉ាណែត តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា បាននាំយកស្រូវពូជប្រមាណជា៣២០តោន ចែកជូនប្រជាពលរដ្ឋចំនួន៣២០០គ្រួសារ មកពីស្រុកចំនួន៥ ក្នុងខេត្តកំពង់ចាម ដែលរងផលប៉ះពាល់ដោយជំនន់ទឹកភ្លៀងនាពេលកន្លងមក។ ពិធីនេះត្រូវបានធ្វើឡើងនាព្រឹកថ្ងៃទី១២ ខែវិច្ឆិកា ឆ្នាំ២០២០ នៅវិទ្យាល័យហ៊ុនសែន ព្រៃទទឹង ស្ថិតនៅក្នុងឃុំជ្រៃវៀន ស្រុកព្រៃឈរ ដោយមានការអញ្ជើញចូលរួមពី នាយឧត្តមសេនីយ៍ គន់ គីម ទេសរដ្ឋមន្ដ្រីទទួលបន្ទុកបេសកកម្មពិសេស និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្ដរាយ លោក អ៊ុន ចាន់ដា អភិបាលខេត្តកំពង់ចាម លោក លោកស្រី ប្រតិភូអមដំណើរ ក្រុមការងាររាជរដ្ឋាភិបាលចុះមូលដ្ឋាន ថ្នាក់ដឹកនាំមន្ទីរអង្គភាពពាក់ព័ន្ធជុំវិញខេត្ត រួមទាំងអាជ្ញាធរមូលដ្ឋានផងដែរ ។
ថ្លែងក្នុងពិធីសំណេះសំណាលនោះ លោក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ ជាមេបញ្ជាការកងទ័ពជើងគោក បានមានប្រសាសន៍ថា សម្តេចតេជោទោះនាពេលនេះមិនបានអញ្ជើញមកផ្ទាល់ក៏ដោយ ក៏សម្តេចតែងតែគិតគូរជានិច្ចដល់សុខទុក្ខ ជីវភាពរស់នៅរបស់ប្រជាពលរដ្ឋ ជាពិសេសនោះចំពោះប្រជាពលរដ្ឋរងគ្រោះដែលជួបការលំបាកដោយប្រការផ្សេងៗ មិនថានៅទីតំបន់ជិតឬឆ្ងាយ។
ជាមួយគ្នានោះ លោក ក៏បាននាំមកនូវប្រសាសន៍របស់សម្ដេចតេជេចតេជោ ដែលបានថ្លែងអំណរអរគុណចំពោះការបោះឆ្នោតគាំទ្រពីជនរួមជាតិបងប្អូនប្រជាពលរដ្ឋ ហើយក៏បានអរគុណចំពោះការចូលរួមថែរក្សាសុខសន្តិភាព ដេីម្បីបន្តការអភិវឌ្ឍន៍ឲ្យមានការរីកចម្រើន។ ព្រមទាំងបានអំពាវនាវដល់បងប្អូនប្រជាពលរដ្ឋឲ្យមានការថែទាំសុខភាព ដោយអនុវត្តន៍តាមការណែនាំរបស់ក្រសួងសុខាភិបាល ឲ្យបានជាប់ជាប្រចាំ ដើម្បីទប់ស្កាត់ការឆ្លងរីករាលដាលនៃជំងឺកូវីដ-១៩ និងជំងឺរាតត្បាតផ្សេងៗផងដែរ។
លោក អ៊ុន ចាន់ដា អភិបាលខេត្តកំពង់ចាម បានឲ្យដឹងថា បន្ទាប់ពីទទួលរងឥទិ្ធពលព្យុះ និងភ្លៀងធ្លាក់ខ្លាំង នៅអំឡុងដើមខែតុលា ឆ្នាំ២០២០ តាមបណ្តាស្រុកមួយចំនួន នៅក្នុងខេត្តកំពង់ចាម បានទទួលរងផលប៉ះពាល់ដោយសារ ជំនន់ទឹកភ្លៀង ដែលប៉ះពាល់លើដំណាំស្រូវរបស់ប្រជាកសិករ ចំនួន ២.៩០៤ហិចតា ស្មើនឹង៣.៩៣២គ្រួសារ ក្នុងនោះ ខូចខាតចំនួន ១.៩៦៧ហិចតា ស្មើនឹង៣.២០០គ្រួសារ និងបានប្រសើរឡើងវិញចំនួន៩៣៧ហិចតា ស្មើនឹង ១.១៥៣ គ្រួសារ។
គួរបញ្ជាក់ថា តាមរយៈគណៈកម្មាធិការជាតិគ្រប់គ្រងគ្រោះមហន្តរាយ សម្ដេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត បានឧបត្ថម្ភស្រូវពូជ ចំនួន៣២០តោន សម្រាប់ការស្ដារឡើងវិញ ចំនួន១.៩៦៧ហិចតា នៅស្រុកបាធាយ ស្រុកជើងព្រៃ ស្រុកព្រៃឈរ ស្រុកកំពង់សៀម និងស្រុកស្ទឹងត្រង់ សរុបចំនួន ៣២០០គ្រួសារ ដោយក្នុងមួយគ្រួសារទទួលបានស្រូវពូជ ចំនួន១០០គីឡូក្រាម និងថវិកា ចំនួន១០ម៉ឺនរៀល ផងដែរ ៕ ដោយ ៖ សុផល
