ភ្នំពេញ ៖ សពបុរសម្នាក់ ដែលសម្រេចចិត្តទៅលោតទឹកសម្លាប់ខ្លួន ពីលើស្ពានជ្រោយចង្វារកាលពី វេលា យប់ថ្ងៃទី០៦ ខែ មករា ឆ្នាំ ២០២១ បន្ទាប់ពីមានទំនាស់គ្នា ក្នុងគ្រួសារ បានអណ្តែតឡើង ហើយ កាលពីវេលាម៉ោងប្រមាណ១២និង៣០នាទីថ្ងៃទី០៨ ខែ មករា ឆ្នាំ ២០២១ នេះ នៅចំណុច មុខ ផ្សាររាត្រី ក្នុង ខណ្ឌដូនពេញ ។
បុរសដែល គិតខ្លី ឈ្មោះ សំ បញ្ញា អាយុ ២៤ឆ្នាំ មុខ របររត់ម៉ូតូកង់៣ មានលំនៅ ផ្ទះជួល ក្នុងភូមិ ព្រែក តាគង់ សង្កាត់ចក្រអង្រែលើ ខណ្ឌមានជ័យ រាជធានីភ្នំពេញនិងមានស្រុកកំណើតភូមិ ព្រៃ តាបេស ឃុំពោធិ៍ ស្រុកស្រីសន្ធរ ខេត្តកំពង់ចាម។
តាមព័ត៌មានអោយដឹងថា បន្ទប់ពីទន្ទឹងរង់ចាំ អស់រយៈពេល២ថ្ងៃ សពបុរសរូបនោះ បានផុសអណ្តែតឡើង នៅទន្ទឹមផែអណ្តែត មុខ ផ្សាររាត្រី ហើយ ត្រូវបានក្រុមគ្រួសារបានជួល ទូកអ្នកនេសាទ អូស ទៅ ដាក់ច្រាំងទន្លេផ្នែកខាងកើតដើម្បី ស្រង់ឡើង យកទៅធ្វើបុណ្យតាមប្រពៃណី នៅស្រុកកំណើត។
គួរបញ្ជាក់ថា បុរសមានវិបត្តិរូបនោះ បានជិះម៉ូតូកង់៣មួយគ្រឿង បានធ្វើដំណើរ ទៅលោតទឹកសម្លាប់ខ្លួន ពីលើស្ពានជ្រោយចង្វារថ្មី កាលពីវេលាម៉ោងប្រមាណ៧និង៥០នាទី យប់ថ្ងៃ ទី០៦ ខែ មករាឆ្នាំ ២០២១។ បន្ទាប់ពីលោតសម្លាប់ខ្លួន ក៏បានលិចបាត់នៅក្នុងទន្លេ ហើយបានបន្សល់ទុក ម៉ូតូកង់៣ មួយគ្រឿងពណ៌ក្រហមលាយស ពាក់ស្លាកលេខ ភ្នំពេញ១HJ.៨៤៩៨ ព្រមទាំងស្បែកជើង មួយគូ ត្រូវបាននគរបាលប៉ុស្តិ៍ស្រះចក ខណ្ឌដូនពេញ យកទៅរក្សាទុក។
តាមព័ត៌មានអោយដឹងថា នៅថ្ងៃមុនពេលកើតហេតុជនរងគ្រោះ ព្រមទាំងភរិយា ក៏បានជិះម៉ូតូកង់ចេញពីផ្ទះ ទៅផ្ទះបងប្រុស ឈ្មោះ សំ ឧត្តម នៅសង្កាត់ព្រែកលៀប ខណ្ឌជ្រោយចង្វារ ដើម្បី ពិភាក្សា រៀបចំធ្វើបុណ្យខួប៣ឆ្នាំ របស់ម្តាយ។ បន្ទាប់ពី ពិភាក្សារួច នៅវេលាយប់ ក៏បានរៀបចំបាយជុំគ្នា និងផឹកផងដែរ។
តាមព័ត៌មានពីបងប្រុស អោយដឹងថា ខណៈពេលដែលផឹកស្រវឹង ក៏មានទំនាស់គ្នា ជាមួយ ប្រពន្ធ ហើយប្អូន ប្រុសក៏បានជិះម៉ូតូកង់៣ មកលោតទឹកសម្លាប់ខ្លួន ក្រោយមកទើបសមត្ថកិច្ចទូរសព្ទប្រាប់ទើបដឹង។ បន្ទាប់ពីលោតទឹកសម្លាប់ខ្លួន អស់រយៈពេល ២ថ្ងៃ សពក៏បានអណ្តែតឡើង ត្រូវបានក្រុមគ្រួសារនាំយកទៅធ្វើបុណ្យ៕
