ភ្នំពេញ៖ ដើមឈើធំៗជាច្រើនដើមនៅលើសួនមុខមន្ទីរពេទ្យអង្គឌួង ស្ថិតក្នុងខណ្ឌដូនពេញមានអាយុកាលជាង៣០០ឆ្នាំ ចំនួន០៣ដើម គ្រោងកាប់យកចេញ នៅសប្តាហ៍ក្រោយនេះ ដោយសារតែដើមឈើទាំង០៣ដើមនោះពុកគល់ ប្រហោងក្នុង ទុកយូរទៅ នឹងមានហានិភ័យដល់ប្រជាពលរដ្ឋដែរដំណើរតាមវិថីនោះ។
លោកសំ សាមុត ប្រធានអង្គភាពសួនច្បារ និងរុក្ខជាតិនៃមន្ទីរសាធារណការនិងដឹកជញ្ជូនរាជធានីភ្នំពេញបានឱ្យដឹងនៅព្រឹកថ្ងៃ០៨ មករាឆ្នាំ២០២១នេះថា ដើមឈើធំៗនៅសួនមុខពេទ្យព្រះអង្គឌួងនេះ មានចំនួនប្រមាណ៥០ដើមធំៗ និងមានអាយុកាលប្រមាណជាជាង៣០០ឆ្នាំមកហើយ។ ក្នុងនោះដើមឈើធំៗចំនួន០៣ដើម ត្រូវបានអាជ្ញាធររាជធានី ដោយមានការឯកភាពពីក្រសួងកសិកម្មរុក្ខាប្រមាញ់ និងនេសាទ គ្រោងកាប់យកចេញនៅសប្តាហ៍ក្រោយនេះ ដោយសារតែដើមឈើទាំង០៣ដើមនោះ ពុកគល់ ប្រហោងក្នុង ដើម្បីបញ្ចៀសគ្រោះថ្នាក់ដល់ប្រជាពលរដ្ឋជាអ្នកដំណើរជាយថាហេតុ។
ក្រោយពីកាប់យកចេញហើយ អាជ្ញាធររាជធានីភ្នំពេញនិងដាំដើមឈើថ្មីជំនួសវិញ។ ចំណែកដើមឈើដែលនៅសល់ ក្រៅពីបីដើមនេះ អង្គភាពរបស់លោកនឹងកាត់គ្រី(លះមែកចេញ)ផងដែរ ដើម្បីកាត់បន្ថយទម្ងន់ដើមឈើ ហើយក៏ជាការលើកសោភណ្ឌភាពរាជធានីភ្នំពេញឲ្យកាន់តែមានសោភ័ណភាពស្រស់បំព្រងផងដែរ៕
