លោក ឡុង កុសល ជាអ្នកនាំពាក្យអាជ្ញាធរជាតិអប្សរា បានប្រាប់អ្នកយកព័ត៌មានថា ក្រុមការងារទប់ស្កាត់សំណង់ខុសច្បាប់នៃអាជ្ញាធរជាតិអប្សរា បាន ទៅរុះរើ របង របស់លោកស្រី លីអ៊ុអេង ដោយសារតែ ការដាំបង្គោលរបងឬដាំឬស្សីធ្វើជារបង នោះ បានសង់បំពានដោយគ្មានច្បាប់អនុញ្ញាតក្នុងតំបន់២នៃរមណីយដ្ឋានអង្គរ ផ្ទុយពីព្រះរាជក្រឹត្យ ស្តីពីការចាត់ចែងនិងគ្រប់គ្រងតំបន់សៀមរាបអង្គរ និងសេចក្តីសម្រេច ស្តីពីការគ្រប់គ្រងដីធ្លីក្នុងតំបន់រមណីយដ្ឋានអង្គរដែលបញ្ជាក់ថា រាល់ការសាងសង់ ឬអភិវឌ្ឍន៍ ត្រូវមានការអនុញ្ញាតជាមុន។
ការបំភ្លឺរបស់លោកឡុងកុសល បានធ្វើឡើងបន្ទាប់ពីលោកស្រី លីអ៊ុំអេង និង ពលរដ្ឋចំនួន៦គ្រួសារផ្សេងទៀត បានប្ដឹងលោកពីបទបំផ្លិចបំផ្លាញទ្រព្យសម្បត្តិនៅលើដីកម្មសិទ្ធិរបស់ពួកគេ ដូចជាខូចខាតដំណាំ របងថ្ម និងឈើ កាលពីថ្ងៃទី២២ ២៣ និង២៤ ខែធ្នូ ឆ្នាំ២០២០ ហើយទាមទារ សំណងជំងឺចិត្តផងដែរ ។លោកបន្តថា ការរុះរើនេះ គឺធ្វើឡើងនៅភូមិអូរទទឹង ឃុំព្រះដាក ស្រុកបន្ទាយស្រី ខេត្តសៀមរាប (តំបន់២នៃរមណីយដ្ឋានអង្ករ ) មិនមែនស្ថិតនៅភូមិតា ប៉ាង អំពិលបង្កោង គិរីមានន្ទ និងភូមិត្នោត ឃុំអំពិល ស្រុកប្រាសាទបាគង ដូចការអះអាងរបស់លោកស្រី លី អ៊ុអេង នោះទេ។
លោកអះអាងថា មុននឹងក្រុមការងារទប់ស្កាត់សំណង់ខុសច្បាប់នៃអាជ្ញាធរជាតិអប្សរា អនុវត្តវិធានការរដ្ឋបាលរុះរើរបង ដោយមានការចូលរួមពីអាជ្ញាធរផងនោះ ក្រុមការងារ បានជួបផ្ទាល់ជាមួយលោកស្រី លី អ៊ុអេងនិងបិទសេចក្តីជូនដំណឹង តម្រូវឲ្យម្ចាស់បង្គោលរបងរុះរើ ដោយខ្លួនឯងចំនួន ២ដងដែរ តែឈ្មោះលី អ៊ុ អេង នៅតែមិនរុះរើរបងនេះចេញទេ៕
