ខេត្តរតនគិរី៖ កម្លាំងមូលដ្ឋានកងរាជអាវុធហត្ថស្រុកកូនមុំ និងជំនាញការិយាល័យបទល្មើសគ្រឿងញៀនកងរាជអាវុធហត្ថខេត្តរតនគិរី និងមានការសម្របសម្រួលនីតិវិធីពីព្រះរាជអាជ្ញារងអមសាលាដំបូងខេត្តរតនគិរី បានឃាត់ជនសង្ស័យចំនួន០១ ពាក់ព័ន្ធនឹងការជួញដូរ និងប្រើប្រាស់សារជាតិញៀន នៅការដ្ឋានទី៦ក្រុមហ៊ុនហ័ងអាញ់យ៉ាឡាយ ស្ថិតនៅក្នុងភូមិ៣ ឃុំស្រែអង្គ្រង ស្រុកកូនមុំ នៅវេលាម៉ោង៨,៣០នាទីព្រឹក ថ្ងៃទី១០ ខែមករា ឆ្នាំ២០២១ ។
លោកមេបញ្ជាការកងរាជអាវុធហត្ថស្រុកកូនមុំ បានឲ្យដឹងថា ក្នុងប្រតិបត្តិការសមត្ថកិច្ចឃាត់ខ្លួនជនសង្ស័យម្នាក់នាក់ឈ្មោះ ភាន ចិត្ត (ហៅដេត) ភេទប្រុស អាយុ២៨ ឆ្នាំជនជាតិខ្មែរ មុខរបរមិនពិតប្រាកដស្រុកកំណើតភូមិថ្មី ឃុំឃ្សឹម ស្រុកស្នួល ខេត្តក្រចេះ មានទីលំនៅបច្ចុប្បន្នស្នាក់នៅក្នុងការដ្ឋានទី៦ ក្រុមហ៊ុនហ័ងអាញ់យ៉ាឡាយស្ថិតនៅក្នុងភូមិ៣ ឃុំស្រែអង្គ្រងស្រុកកូនមុំ ។
លោកមេបញ្ជាការបានឲ្យដឹងទៀតថា តាមចម្លើយរបស់ជនសង្ស័យ កម្លាំងជំនាញបានពួនស្ទាក់មុខសញ្ញាផ្សេងទៀត រហូតដល់ម៉ោង៤,១០នាទី ថ្ងៃខែឆ្នាំដដែល មុខសញ្ញាជាមេខ្លោងជួញដូរគ្រឿងញៀនបានបង្ហាញខ្លួន ភ្លាមៗកម្លាំងបានដេញតាមមុខសញ្ញាតែដោយសារភូមិសាស្ត្រស្មុគស្មាញ មុខសញ្ញាជនសង្ស័យ ០២នាក់បានបោះថ្នាំញៀនចោល និងផ្តួលម៉ូតូ រត់គេចខ្លួនចូលក្នុងព្រៃសហគមន៍បាត់។
បច្ចុប្បន្នវត្ថុតាងចាប់យមកករួមមានម្សៅក្រាមពណ៌សថ្លាចំនួន ០៤កញ្ចប់, ដាវចំនួន ០៥, ទូរស័ព្ទដៃចំនួន ០២គ្រឿង និងឧបករណ៍សេពគ្រឿងញៀនមួយចំនួន។ បច្ចុប្បន្នកម្លាំងជំនាញកំពុងអនុវត្តតាមនីតិវិធី៕
