ភ្នំពេញ ៖ គ្រោះថ្នាក់ចរាចរណ៍កើតជាជម្លោះ រហូតលោកនាយករងមជ្ឈមណ្ឌលហ្វឹកហ្វឺនភ្នំជំរាយ ដកកាំភ្លើងគំរាមយុវជនម្នាក់ ផ្អើលម្ដុំផ្សារធំថ្មី សង្កាត់ផ្សារទី១ ខណ្ឌដូនពេញ រាជធានីភ្នំពេញនៅវេលាម៉ោង០៤៖៣០នាទីរំលងអធ្រាត្រឈានចូលថ្ងៃទី១០ ខែមករា ឆ្នាំ២០២១។
បើតាមការបញ្ជាក់ពីបុរសម្នាក់ សុំមិនបញ្ចេញឈ្មោះ បានប្រាប់ក្រុមការងារ ដែលផ្សាយផ្ទាល់ថាមុនដំបូងគាត់ឃើញរថយន្តព្រូសបើកបរ ដោយបុរសម្នាក់ ដែលមានកាំភ្លើង បានបើកឡានស្របគ្នាតាមបណ្តោយផ្លូវ៧៣ កៀនផ្សារធំថ្មី ហើយឃើញរថយន្ត បានបើកកៀរម៉ូតូបណ្តាលឲ្យដួល ហើយបានដកកាំភ្លើងពីចង្កេះ រួចស្រែកថាហែងចង់យ៉ាងម៉េច។
ភ្លាមៗនោះជនរងគ្រោះ បានលើកដៃសុំកុំបាញ់គាត់អី ហើយ អ្នកដែលឃើញហេតុការណ៍បានរត់មកជួយជនរងគ្រោះ ដែលដួលម៉ូតូបានបាក់ដងកាំបិត និងត្រូវត្រង់ប្រអប់ជើង បញ្ជូនទៅកាន់មន្ទីរពេទ្យភ្លាមៗផងដែរ។ បន្ទាប់មកអ្នកដែលបង្កនៅតែបន្តសំញែងកាំភ្លើងនៅមុខសមត្ថកិច្ចដដែលៗ ទើបសមត្ថកិច្ចសុំដកទុកសិន តែជនបង្កប្រគល់អោយតែសំបកកាំភ្លើង មិនប្រគល់គ្រាប់អោយនោះទេ ហើយបានស្រែកគំហកដាក់សមត្ថកិច្ចថែមទៀតផង។
អ្នកបង្ក បានស្រែកប្រាប់ក្រុមការងារ ថាខ្លួនមានមុខងារជាមន្ត្រីកងរាជអាវុធហត្ថនិងមានតួនាទីនាយករងមជ្ឈមណ្ឌលហ្វឹកហ្វឺនភ្នំជំរាយ ហើយខ្លួនបានចេញពីផឹកស៊ីមួយកន្លែង បំណងបើករថយន្តមកផ្ទះរបស់ខ្លួននៅជិតកន្លែងកើតហេតុ។
ជាចុងក្រោយក្រោយជនរងគ្រោះមិនចង់មានរឿងវែងឆ្ងាយ ក៏មិនបានដាក់ពាក្យបណ្តឹងនៅប៉ុស្តិ៍ប៉ូលិសទេដោយសុំត្រឹមតែអ្នកបង្កសងថ្លៃព្យាបាលនៅមន្ទីរពេទ្យតែប៉ុណ្ណោះ ដើម្បីបញ្ចប់រឿង៕
