ភ្នំពេញ៖ រថយន្តដឹកឥដ្ឋមួយគ្រឿង ដាច់ហ្វ្រាំងរ៉េចង្កូតឡើងលើសួនច្បារពុះចែកទ្រូងផ្លូវ រួចបន្ដបុុកបង្គោលភ្លើងបណ្ដាលអោយដួលត្រេត ដោយខ្វះការប្រុងប្រយ័ត្ន។
ហេតុការណ៍នេះកើតឡើងកាលពីវេលាម៉ោង ១០ និង១៥ នាទីព្រឹក ថ្ងៃទី១០ ខែមករា ឆ្នាំ២០២០ ស្ថិតតាមបណ្តោយផ្លូវហាន់ណូយ ក្នុងសង្កាត់ឃ្មួញ ខណ្ឌសែនសុខ រាជធានីភ្នំពេញ។
តាមប្រភពព័ត៌មានពីអ្នករួមដំណើរនៅក្នុងរថយន្តដឹកឥដ្ឋបានប្រាប់ឱ្យដឹងថា មុនពេលកើតហេតុគាត់បានបើករថយន្តមួយគ្រឿងប្រភេទដឹកឥដ្ឋ ពាក់ស្លាក់លេខ ភ្នំពេញ 3A ~0560 បើកបរតាមបណ្តោយផ្លូវហាន់ណូយទិសដៅពី ជើង ទៅត្បូង ខណៈពេលមកដល់ចំណុចកើតហតុ ស្រាប់តែមានរថយន្ត គាត់បានដាច់ហ្វ្រាំង ធ្វើឱ្យគាត់ដែលជាម្ចាស់រថយន្តដឹកឥដ្ឋ ចាប់ហ្វ្រាំងមិនទាន់ក៏ បួងចង្កូតគេចរថយន្តដែលកំពុងបើកនៅខាងមុខ រហូតជ្រុលឡើងលើសួនច្បារពុះចែកទ្រូងផ្លូវ និងបន្ដមកបុកបង្គោលភ្លើងបណ្តាលឱ្យរងការខូចខាត ទាំងរថយន្ត រួមទាំងសួនច្បារ តែមិនបណ្តាលនរណាម្នាក់រងរបួសនៅក្នុងហេតុការណ៍នេះទេ ចំណែកអ្នកបើករថយន្តដោយខ្វះការប្រុងប្រយ័ត្ននោះ បានរត់ចេញពីកន្លែងកើតហេតុភ្លាមៗតែម្តងដោយបន្សល់ទុកតែរថយន្ដប៉ុណ្ណោះ ។
គួរបញ្ជាក់ផងដែរថា រថយន្ដដឹកឥដ្ឋខាងលើមិបាន ចាប់ស្លាក់លេខដូចរថយន្ដគេធម្មតានោះទេ បែរជាដោះស្លាក់លេខដាក់ក្នុងរថយន្ដទៅវិញ។
ក្រោយពេលកើតហេតុកម្លាំងសមត្ថកិច្ចមូលដ្ឋាន រួមកម្លាំងសមត្ថកិច្ចជំនាញ បានចុះមកដល់ចំណុចទីតាំងកើតហេតុ រួចធ្វើការវាស់វែង យករថយន្តទៅរកស្សាទុកនៅការិយាល័យចរាចរណ៍ផ្លូវគោក រងចាំការដោះស្រាយនៅពេលក្រោយ៕ទេស សុវណ្ណ
