ក្រចេះ ៖ ស្ថិតនៅតាមបណ្តោយដងទន្លេមេគង្គ កោះព្រហ្មចារីយ៍ជ្រោយបន្ទាយ គឺជាសហគមន៍អេកូទេសរណ៍ថ្មីមួយរបស់ខេត្តក្រចេះ ដែលទើបតែត្រូវបានបង្កើតឡើងនៅចុងឆ្នាំ២០២០នេះ ដោយមានការជួយជ្រោមជ្រែងពីមន្ទីរទេសចរណ៍ខេត្តក្រចេះ និងអង្គការWWF។
សហគមន៍នេះមានទីតាំងស្ថិតនៅក្នុងឃុំជ្រោយបន្ទាយ ស្រុកព្រែកប្រសព្វ ចម្ងាយចម្ងាយ ១៧គ.ម ពីខេត្តក្រចេះ។ សហគមន៍នេះសំបូរទៅដោយសក្តានុពលទេសចរណ៍បែបធម្មជាតិជាច្រើនដែលរួមមាន៖ ព្រៃឈើ សត្វស្លាប កោះ សត្វព្រៃ(សត្វក្តាន់) ទេសភាពព្រៃលិចទឹកទន្លេមេគង្គ សូម្បីតែសត្វផ្សោតទន្លេមេគង្គដ៏កម្រក៏ស្ថិតនៅតំបន់នេះផងដែរ។
ដើម្បីទៅដល់ទីនោះ ទេសចរត្រូវធ្វើដំណើរតាមបណ្តោយផ្លូវខេត្តលេខ៣៧៧ ចម្ងាយប្រមាណ៧គ.ម ត្រង់ចំណុចកំពង់ដរ(ឬស្សីចារ-កែង) រួចត្រូវបន្តដំណើរតាមសាឡាងនោះប្រមាណជា១៥ នាទីនឹងទៅដល់សហគមន៍នេះ។
នៅទីនោះ ទេសចរ អាចជិះទូកមើលទេសភាពព្រៃលិចទឹក ទស្សនាសត្វស្លាប សម្រាកលំហែរ ងូតទឹកកម្សាន្ត និងពិសាអាហារនៅតាមកោះស្អាតជាច្រើន។ សហគមន៍ក៏មានផ្តល់សេវាកម្មម្ហូបអាហារ និងស្នាក់នៅតាមផ្ទះស្នាក់សហគមន៍នៅទីនោះផងដែរ។
ការមកកំសាន្តរបស់លោកអ្នកនឹងផ្តល់អត្ថប្រយោជន៍ជាច្រើនសម្រាប់ប្រជាសហគមន៍មូលដ្ឋានពីការដែលធ្លាប់តែទទួលបានចំណូលពីការធ្វើស្រែចម្ការ និងរបរដែលធ្វើប៉ះពាល់ដល់ធានធានធម្មជាតិ ងាកមកទទួលចំណូលពីរការផ្តល់សេវាកម្មទេសចរណ៍ កាត់បន្ថយការចំណាកស្រុក ចូលរួមអភិរក្សធនធានក្នុងតំបន់ និងចូលរួមលើកកម្ពស់ជីវភាពប្រជាពលរដ្ឋឲ្យប្រសើរជាងមុនផងដែរ៕
