ស្រុកព្រៃនប់ ៖ តាមសមត្ថកិច្ចអោយដឹងថា អ្នកបើកបរម៉ូតូម្នាក់បានស្លាប់ក្នុងហេតុការណ៍គ្រោះថ្នាក់ចរាចរជិះម៉ូតូបុកឆ្កែដួលចូលរថយន្ត បណ្តាលអោយរថយន្តកិនស្លាប់នៅនឹងកន្លែង នៅ វេលាម៉ោង ៦:៣០ នាទីព្រឹក ថ្ងៃទី១៩មករា២០២១លើផ្លូវជាតិលេខ៤ ចន្លោះបង្គោលគីឡូម៉ែត្រលេខ ១៧៣-១៧៤ ស្ថិតនៅភូមិត្រពាំងគា ឃុំជើងគោ ស្រុកព្រៃនប់ ខេត្តព្រះសីហនុ មានគ្រោះថ្នាក់ចរាចរណ៍មួយកើតរវាងម៉ូតូ០១ គ្រឿង ម៉ាក HONDA DREAM ពណ៌ខ្មៅ គ្មានផ្លាកលេខ ដែលមានទិសដៅពីភ្នំពេញ-ខេត្តព្រះសីហនុ បើកបរដោយឈ្មោះ មុត មាន ភេទប្រុស អាយុ ១៨ឆ្នាំ មានទីលំនៅភូមិត្រពាំងគា ឃុំជើងគោ ស្រុកព្រៃនប់ ខេត្តព្រះសីហនុ ដល់ចំណុចកើតហេតុបានបុកឆ្កែ១ក្បាល ហើយដួលខ្ទៀតចូលរថយន្ត ០១គ្រឿងមិនស្គាល់ភិនភាគ និងអត្តសញ្ញាណអ្នកបើកបរ ដែលមានទិសដៅពីខេត្តព្រះសីហនុ ឆ្ពោះទៅ រាជធានីភ្នំពេញ ។
ករណីគ្រោះថ្នាក់ខាងលើ បណ្តាលអោយស្លាប់អ្នកបើកបរម៉ូតូ ឈ្មោះ មុត មាន ស្លាប់នៅនឹងកន្លែងកើតហេតុ ។
បច្ចុប្បន្ន សាកសពបានប្រគល់អោយក្រុមគ្រួសារយកទៅធ្វើបុណ្យតាមប្រពៃណី រីឯវត្ថុតាងម៉ូតូ យកមករក្សាទុកនៅអធិការដ្ឋាននគរបាលស្រុកព្រៃនប់។ ដោយឡែកអ្នកបើកបររថយន្តមិនស្គាល់អត្តសញ្ញាណ បានបើករថយន្តគេចចេញពីកន្លែងកើតហេតុ ជាមួយគ្នានេះសមត្ថកិច្ចកំពុងធ្វើការស្រាវជ្រាវដើម្បីដោះស្រាយតាមនីតិវិធីច្បាប់៕
