ភ្នំពេញ៖ បុរសម្នាក់ជិះម៉ូតូមួយគ្រឿងក្នុងល្បឿនលឿនរេចង្កូតបុកខឿនផ្លូវបណ្ដាលឲ្យហោះផ្លោងធ្លាក់បោកនឹងថ្នល់បាក់.កស្លាប់នៅនឹងកន្លែងកើតហេតុយ៉ាងអាណោចអាធ័ម។
ហេតុការណ៍នេះកើតឡើងកាលពីវេលាម៉ោងប្រហែល០១: ៣០ នាទីយប់រំលងអធ្រាត្រថ្ងៃទី១៨ឈានចូលថ្ងៃទី ១៩ ខែមករាឆ្នាំ ២០២១ នៅចំណុចមុខសណ្ឋាគាកាំបូឌីយាណា តាមបណ្ដោយផ្លូវព្រះស៊ីសុវត្ថិ ក្នុងសង្កាត់ចតុមុខ ខណ្ឌដូនពេញ រាជធានីភ្នំពេញ។ សពជនរងគ្រោះមិនទាន់ស្គាល់អត្តសញ្ញាណ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញជនរងគ្រោះជិះម៉ូតូម្នាក់ឯងម៉ាកឌ្រីមសង់ ពណ៌ខ្មៅពាក់ស្លាកលេខភ្នំពេញ1IE-3585ដំណើរទិសដៅពីត្បូងទៅជើងក្នុងល្បឿនលឿនលុះមកដល់ចំណុចកើតហេតុខាងលើរេចង្កូតមកខាងស្តាំដៃទៅបុកខឿនផ្លូវហោះផ្លោងបណ្តាលឲ្យជនរងគ្រោះធ្លាក់បោកនិងថ្មចិញ្ចើមផ្លូវបាក់កស្លាប់យ៉ាងអាណោចអាធ័មនៅនឹងកន្លែងកើតហេតុ។
ក្រោយពេលកើតហេតុសមត្ថកិច្ចមូលដ្ឋានបានចុះមកដល់បានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយកម៉ូតូយកទៅរក្សាទុកបណ្ដោះអាសន្ន។ដោយឡែកសពជនរងគ្រោះសមត្ថកិច្ចធ្វើកំណត់ហេតុរួចដឹកតាមរថយន្ដមកតម្កល់ទុកនៅវត្តទឹកថ្លារង់ចាំទំនាក់ទំនងរកសាច់ញាតិដើម្បីមកទទួលយកទៅធ្វើបុណ្យតាមប្រពៃណី៕
