រតនគិរី៖ ប្រធានភូមិបាលក្រុងបានលុងបានបញ្ជាក់ថាការចុះបញ្ជីដីធ្លីជាលក្ខណៈប្រព័ន្ធ ប្រជាពលរដ្ឋត្រូវរៀបចំឯកសារឱ្យបានគ្រប់គ្រាន់។
លោក ប៊ី ជីវន្តរ៉ា ប្រធានភូមិបាលក្រុងបានលុងលើកឡើងបែបនេះក្នុងឱកាសដែលលោកបានដឹកនាំមន្ត្រីជំនាញចុះផ្សព្វផ្សាយដល់បងប្អូនប្រជាពលរដ្ឋស្ថិតនៅក្នុងភូមិថ្មដាសង្កាត់បឹងកន្សែងក្រុងបានលុងខេត្តរតនគិរីនៅព្រឹកថ្ងៃទី១៩ ខែមករា ឆ្នាំ២០២១ បន្ទាប់ពីមានការប្រជុំបើកវេទិកាចុះបញ្ជីដីធ្លីនៅសាលាសង្កាត់បឹងកន្សែងកាលពីថ្ងៃ១៥ ខែមករា ឆ្នាំ ២០២១ កន្លងទៅ។
លោក ប៊ី ជីវន្តរ៉ា បាននិយាយថា «ដើម្បីងាយស្រួលក្នុងការចុះបញ្ជីដីធ្លីជាលក្ខណៈប្រព័ន្ធបងប្អូនត្រូវមានឯកសារគ្រប់គ្រាន់ដូចជា សៀវភៅគ្រួសារ អត្តសញ្ញាណប័ណ្ណ សំបុត្រកំណើត និងសំបុត្រអាពាហ៍ពិពាហ៍ជាដើម»។
លោកប្រធានភូមិបាលរូបនេះបានបញ្ជាក់ទៀតថាក្រោយការវាស់វែងកំណត់ព្រំដីក្បាលដីនីមួយៗរួចរាល់ហើយខាងជំនាញត្រូវប្រជុំគណៈកម្មការដីរដ្ឋថ្នាក់ក្រុងនិងដីរដ្ឋថ្នាក់ខេត្តរួចបិទប្រកាសរយៈពេល ១៥ថ្ងៃ និងធ្វើរបាយការណ៍ជូនទៅលោកអភិបាលខេត្តសម្រេចទើបខាងមន្ទីដែនដីចេញប័ណ្ណជូនឱ្យបងប្អូនប្រជាពលរដ្ឋ៕
