ខេត្តស្ទឹងត្រែង ៖ គ្រោះថ្នាក់ចរាចរណ៍កម្របានឃើញដោយរថយន្ត៣គ្រឿងបុកជាប់គ្នានៅខាងលិចស្ពានមេគង្គស្រុកថាឡាបរិវ៉ាត់ខេត្តស្ទឹងត្រែងវេលាម៉ោង៥ល្ងាចថ្ងៃទី២៤ ខែមករាឆ្នាំ២០២១នេះ ។
សមត្ថកិច្ចជំនាញនៃស្នងការនរគបាលខេត្តស្ទឹងត្រែងបានឱ្យដឹងថា មានរថយន្តប្រភេទយីឌុប១គ្រឿងដឹកដំឡូងមីបានខូចអែបម្ខាងផ្លូវក្នុងទិសដៅពីលិចទៅកើតនៅលើផ្លូវជាតិលេខ៩ខាងលិចស្ពានមេគង្គ។រីឯរថយន្តយីឌុបមួយគ្រឿងទៀតបានបើកបរចុះពីលើស្ពានមេគង្គក្នុងទិសដៅពីកើតទៅលិច។លុះពេលរថយន្តចុះពីស្ពានមេគង្គមកដល់កន្លែងរថយន្តយីឌុបដឹកដំឡូងមីកំពុងខូចគាប់ជួនមានរថយន្តដឹកត្រាក់ទ័រកាយដីក្នុងទិសដៅពីលិចមកកើតក៏បានបុកព្រមគ្នាកៀបជាប់ទាំង២គ្រឿងតែម្ដង។
ខណៈពេលនេះអ្នកធ្វើដំណើរតាមរថយន្តតូចធំមិនអាចឆ្លងកាត់ពីក្រុងស្ទឹងត្រែងទៅកាន់ខេត្តព្រះវិហារនិងពីខេត្តព្រះវិហារមកកាន់ក្រុងស្ទឹងត្រែងបានទេ។ពីព្រោះរថយន្តទាំង៣គ្រឿងនេះបានកៀបជាប់នៅលើផ្លូវមិនទាន់អូសចេញនៅឡើយ។ហេតុការណ៍នេះមិនបង្កឱ្យមានគ្រោះថ្នាក់ដល់អាយុជីវិតនរណាម្នាក់ទេ៕
