ភ្នំពេញ ៖ បុរសម្នាក់បានឈ្លក់ទឹកស្លាប់ បន្ទាប់ពីជិះម៉ូតូលឿនមិនប្រយត្ន័ ជ្រុលទៅបុកប៉ារ៉ាស់ ហោះធ្លាក់ចូលប្រឡាយទឹកស្អុយ ម៉ូតូសង្កត់ពីលើ កាលវេលាម៉ោង ៧និង៣០នាទីយប់ ថ្ងៃអាទិត្យ ទី២៤ ខែមករា ឆ្នាំ២០២១ ស្ថុិតតាមបណ្ដោយផ្លូវលំ ចេញពីផ្លូវ៦០ម៉ែត្រក្នុងសង្កាត់ជើងឯក ខណ្ឌដង្កោ រាជធានីភ្នំពេញ ។
ជនរងគ្រោះមានឈ្មោះ ចាប សុខផល ភេទប្រុស អាយុ៣០ឆ្នាំ មានអាសយដ្ឋាន ផ្ទះលេខ៨២៩ ផ្លូវជាតិលេខ១ ភូមិរាំងដេក ឃុំគគីធំស្រុកគៀនស្វាយ ខេត្តកណ្ដាល ជិះម៉ូតូ ម៉ាកនិច ពណ៌ទឹកប្រាក់ ពាក់ស្លាកលេខ កណ្ដាល 1AB-8455 ។
តាមប្រភពពីកន្លែង កើតហេតុបានឱ្យដឹងថា មុនពេលកើតហេតុ គេឃើញបុរសរងគ្រោះ ជិះម៉ូតូចេញពី៦០ម៉ែត្រចូលផ្លូវលំ ពីលិចទៅកើតយ៉ាងលឿន ខណៈមកដល់ចំណុច កើតហេតុ បានជ្រុលទៅបុកប៉ារ៉ាស ដែលគេហាមមិនឲ្យរថយន្តបើក បណ្ដាលហោះចូលប្រឡាយ ទឹកស្អុយ ម៉ូតូសង្កត់ពីលើ ឈ្លក់ទឹកស្លាប់ គួរឲ្យអណោចអធម៌។
ក្រោយកើតហេតុ សមត្ថកិច្ចមូលដ្ឋាន ចុះមកចំណុចកើតហេតុបានស្រង់ជនរងគ្រោះនិងម៉ូតូមកលើគោក រួចឲ្យរថយន្តដឹកយកទៅតម្កល់ ទុកនៅវត្តឬស្សីសាញ់ រង់ចាំទាក់ទងសាច់ញ្ញាតិ មកទទួលសពយក ទៅធ្វើបុណ្យតាមប្រពៃណី ៕
