ខេត្តបាត់ដំបង៖ រថយន្តហាយឡិនឌ័រដឹកឈើមួយគ្រឿងត្រូវបានអាវុធហត្ថចុះបង្ក្រាប នៅវេលាម៉ោង១៧ និង៣០នាទី កាលពីថ្ងៃទី២៤ ខែមករា ឆ្នាំ២០២១ នៅត្រង់ចំណុចគល់ស្ពានអូរស្ងួត ស្ថិតនៅភូមិអូរស្ងួត ឃុំតាសាញ ស្រុកសំឡូតខេត្តបាត់ដំបង។
យោងតាមរបាយការណ៍ពីកម្លាំងអាវុធហត្ថខេត្តបាត់ដំបងបានឲ្យដឹងថា ក្នុងនោះអាវុធហត្ថបានចុះបង្ក្រាបរថយន្តដឹកឈើ១គ្រឿង ម៉ាកហាយឡិនឌ័រ ពណ៌ទឹកប្រាក់ ពាក់ស្លាកលេខកណ្ដាល 2A-1889 និងឃាត់ខ្លួនជនសង្ស័យ២នាក់ រួមទាំងវត្ថុតាងដកហូតមានរថយន្ដចំនួន ១គ្រឿង, ឈើប្រណិតចំនួន ១៦៤ដុំ និងប្រាក់រៀល ៨៤,៥០០៛។
បច្ចុប្បន្នមន្ត្រីជំនាញកងរាជអាវុធហត្ថខេត្តបាត់ដំបងបានកសាងសំណុំរឿងដើម្បីចាត់ការបន្តទៅតាមនីតិវិធី៕
