ខេត្តព្រះវិហា៖ បុរសចំនួន ៤នាក់ បាននាំគ្នាទៅកាប់ដើមត្នោតងាប់ៗ រកសត្វដង្កូវដួង រួចយកមកបំពងខ្លាញ់ហូបជាមួយបាយ ស្រាប់តែមានអាការៈពុល រាករូស ក្អួតចង្អោរ បណ្តាលឲ្យស្លាប់ម្នាក់ និង៣នាក់ទៀត ត្រូវបានជួយសង្គ្រោះទាន់ពេលវេលា។
ករណីពលរដ្ឋពុល ដង្កូវដួងស្លាប់បានកើតឡើង កាលពីវេលាម៉ោង៥ល្ងាច ថ្ងៃទី២៣ ខែមករា ឆ្នាំ២០២១ ស្ថិតនៅក្នុងភូមិសែនគង់ ឃុំចម្រើន ស្រុកសង្គមថ្មី ខេត្តព្រះវិហារ ។ ជនរងគ្រោះ ទី១-ឈ្មោះ ម៉ៅ លាន ភេទប្រុស អាយុ២៨ឆ្នាំ ( ស្លាប់) ។ ទី២-ឈ្មោះ ប៉ុយ វីន ភេទប្រុស អាយុ២៨ឆ្នាំ។ ទី៣-ឈ្មោះ ឌឹម សុភា ភេទប្រុស អាយុ១៥ឆ្នាំ និងទី៤-ឈ្មោះ ប្រាជ្ញ ពិសី ភេទប្រុស អាយុ៩ឆ្នាំ ។
អាជ្ញាធរមូលដ្ឋានបានឲ្យដឹងថា មុនពេលកើតហេតុ ជនរងគ្រោះ ទាំង៤នាក់ បាននាំគ្នាទៅកាប់ដើមត្នោតងាប់ៗ រកដង្កូវដួង បានប្រហែល១គីឡូក្រាម រួចនាំគ្នាយកទៅបំពងជាមួយខ្លាញ់ ហូបជាមួយនឹងបាយទាំង៤នាក់ ។
ក្រោយពេលហូបបាយរួច បានប្រហែលជា២ម៉ោង ស្រាប់តែមានអាការពុលរាករូស ក្អួតចង្អោរ ហើយពេលនោះជនរងគ្រោះ ឈ្មោះ ប៉ុយ វីន , ឈ្មោះ ប្រាជ្ញ ពិសី និងឈ្មោះ លឹម សុភាព បានយកផ្លែក្រូចឆ្មារច្របាច់ដាក់នឹងទឹកក្តៅផឹកដើម្បីបន្សាប ។
ដោយឡែកឯឈ្មោះ ម៉ៅ លាន មិនបានផឹកទឹកក្រូចឆ្មារបន្សាបដូចគេនោះទេ ទើបបណ្តាលឲ្យមានអាការពុលខ្លាំង ហើយបានស្លាប់នៅវេលាម៉ោង២និង០០នាទីយប់ថ្ងៃទី២៤ ខែមករា ឆ្នាំ២០២១ នៅតាមផ្លូវ ខណៈពេលបញ្ជូនមកមណ្ឌលសុខភាពចម្រើន។
អាជ្ញាធរបញ្ជាក់ថា ក្រោយពេលកើតហតុ សមត្ថកិច្ចជំនាញនៅមូលដ្ឋានបានចុះទៅពិនិត្យ ធ្វើកោសល្យវិច័យសាកសព រួចបានបញ្ជាក់ថា ជនរងគ្រោះស្លាប់ដោយសារ ពុលដង្កូវដួងនោះពិតប្រាកដមែន ។ បន្ទាប់មក បានធ្វើកំណត់ហេតុ ប្រគល់សពជូនក្រុមគ្រួសារបានរៀបចំធ្វើបុណ្យសពតាមប្រពៃណី៕
