មហាជនស្ទើរទូទាំងប្រទេស អ្នកណាមិនស្គាល់អ្នកលក់ផលិតផលតាម online គឺលោកជំទាវឧកញ៉ា អ៊ាន សៀវម៉ី ដែលជេរផ្អើលប្រទេស ជេរហុយដីសំពោង ជេរមិនរើសមុខ មិនថាក្មេងចាស់ក្មេង ដោយមិនមានអ្នកណាហ៊ានចេញមុខតតាំងជាមួយគាត់ឡើយ ដោយសារគាត់មានលុយ និងល្បីមានអ្នកធំៗនៅពីក្រោយ ទើបកន្លងមកគាត់ជេរម៉ាសេរី
ដោយទង្វើរបស់គាត់ធ្វើអោយសីលធម៌សង្គមធ្លាក់ចុះ ជាពិសេសគឺប៉ះពាល់ដល់កិត្តិយសស្ត្រីខ្មែរយ៉ាងខ្លាំង ទីបំផុតជេរចុះ ជេរឡើងជេរចំគេអ្នកខ្លាំង ជេរចំគេដែលយកច្បាប់ជាធំ គេអត់ជេរវិញទេ គេប្តឹង មានអីរត់មិនសប់ដី។
មហាជនមានការសាទរយ៉ាងខ្លាំងចំពោះចំណាត់ការរបស់តុលាការ ដែលអនុវត្តច្បាប់ប្រកបដោយភាពយុត្តិធម៌ និងតម្លាភាព ព្រោះនេះពិតជារឿងសំខាន់ណាស់សម្រាប់ចូលរួមលុបបំបាត់វប្បធម៌អសីលធម៌របស់អ្នកលក់ online ផ្សេងៗ ដែលនិយមជេរហុយដីដូចឧកញ៉ា អ៊ាន សៀវម៉ីនេះ។
គួរបញ្ជាក់ថា លោកជំទាវឧកញ៉ាអ៊ាន សៀវម៉ី ត្រូវបានតុលាការ នៃអយ្យការអមសាលាដំបូងរាជធានីភ្នំពេញ កោះហៅចូលមកបំភ្លឺ កាលពីព្រឹកថ្ងៃទី២៤ ខែធ្នូ ឆ្នាំ២០២០ ពាក់ព័ន្ធករណី បរិហារកេរ្តិ៍ជាសាធារណៈ, ញុះញង់ឲ្យមានការរើសអើង ដែលប្រព្រឹត្ដទៅនៅរាជធានីភ្នំពេញ។
ក្នុងពេលនោះ គេសង្កេតឃើញលោកជំទាវឧកញ៉ា បានចូលទៅបំភ្លឺតាមការកោះហៅនេះ មុន១ថ្ងៃទៀតផង គឺនៅថ្ងៃទី២៣ ខែធ្នូ ឆ្នាំ២០២០ ហើយពេលចេញពីតុលាការវិញ លោកជំទាវឧកញ៉ា មិនបានបកស្រាយអ្វីទាំងអស់ជាមួយនឹងក្រុមអ្នកសារព័ត៌មាន រួចក៏ឡើងជិះរថយន្តម៉ាកPrius ពណ៌ស ពាក់ស្លាកលេខភ្នំពេញ2AQ-3840ជិះចេញទៅបាត់ ជាមួយនឹងការពាក់ម៉ាស់ និងពាក់មួកឃ្លុំបិទជិតនោះ។
ដោយឡែកនៅពេល តុលាការកោះហៅលើកទី២នោះ បែរជាមិនឃើញវត្តមានលោកជំទាវឧកញ៉ាវ័យក្មេងរូបនេះ ចូលខ្លួនទៅឆ្លើយបំភ្លឺឡើយ ទើបនៅល្ងាចថ្ងៃទី២៦ ខែមករា ឆ្នាំ២០២១នេះ សមត្ថកិច្ចក្រសួងមហាផ្ទៃ ក៏ដូចអាជ្ញាធរ កំពុងនៅជុំជិតនៅមុខវិឡារដ៏ស្កឹមស្កៃរបស់លោកជំទាវ ដែលមានទីតាំងស្ថិតនៅក្នុងសង្កាត់ចោមចៅទី១ ខណ្ឌពោធិ៍សែនជ័យ ដើម្បីនាំខ្លួនលោកជំទាវឧកញ៉ាទៅធ្វើការសាកសួរ ហើយរហូតដល់វេលាម៉ោង៥និង៥១នាទីល្ងាចថ្ងៃ ដដែលនេះ មិនទាន់ដកកម្លាំងចេញពីទីតាំងនោះនៅឡើយ៕
