ភ្នំពេញ ៖ លទ្ធផលជាស្ថានប៉ាស្ទ័រកម្ពុជា នៅម៉ោង ២រសៀលថ្ងៃទី១៥ ខែមីនា ឆ្នាំ២០២០ នេះបង្ហាញថា បុរសជនជាតិបារាំងអាយុ៣៥ឆ្នាំ មានវិជ្ជមានផ្ទុកវីរុស កូវីដ-១៩ ហើយប្រពន្ធ និងកូនរបស់គាត់ តម្រូវឲ្យរង់ចាំលទ្ធផលបន្តទៀត។ បច្ចុប្បន្នបុរសជនជាតិបារាំងអាយុ ៣៥ រូបនោះត្រូវបានដាក់ឲ្យសម្រាកនៅមន្ទីពេទ្យមិត្តភាពខ្មែរ-សូវៀតរួចហើយ។
ក្រសួងសុខាភិបាលកម្ពុជា នៅថ្ងៃទី១៥ ខែមីនា ឆ្នាំ២០២០ នេះ បានប្រកាសអំពីការរកឃើញករណីកូវីដ- ១៩ ចំនួន១ករណីថែមទៀត នៅលើជនជាតិបារាំងម្នាក់ អាយុ៣៥ឆ្នាំ ដែលចេញដំណើរមកពីក្រុងប៉ារីស ចូលមកកម្ពុជា កាលពីថ្ងៃទី១៤ ខែមីនា ឆ្នាំ២០២០ ដោយឆ្លងកាត់ប្រទេសសិង្ហបុរី៕
